EDITORYAL - Libreng maintenance drugs

Gikalipay sa mga senior citizens sa Cebu City ang balita nga ibalik na ang libreng maintenance medicines nga nahunong suds a pipila ka bulan.

Ang libreng maintenance medicines kaniadto dili lang mga senior citizen ang nakabenepisyo, kay hasta di mga senior citizens gipanghatagan man, ilabi na kadtong mga kabus nga masakiton nga walay kwartang ikapalit og maintenance medicines.

Sa mga senior citizens sa siyudad, kaning libreng tambal dako na kaayo og matabang kanila sa pagmentinar sa maayong panglawas niining nahibiling mga katuigan nila ibabaw sa yuta.

Sa pagkatinuod, daghang mga senior citizens dinhi sa siyudad nga nagpalta-palta nalang sa ilang maintenance nga gireseta kanila sa ilang mga doktor.

Ang rason, wala na silay extra nga kwarta para niini kay kuwang ra sa ilang pagkaon ug uban pang importanteng gamitan sa ilang kwarta.

Dunay uban, mapalad nga dunay pension kay nakatrabaho man sila kaniadto ug pun-an pa gyud sa financial assistance ug itunol sa ilang mga anak nga maayo na sab og kabutang wala kaayo magkinahanglan aning ayudang libreng tambal, apan maayo gihapon kun dunay libre kaysa ilaha pang paliton.

Apan duna may mas daghang senior citizens nga walay pension, dili sab sila tagaan og kwartang pangpalit sa ilang maintenance ug nagsalig lang sa sobra o salin-salin sa budget sa ilang mga anak nga paigo ra og sweldo para sa ilang tagsa-tagsa ka pamilya.

Si kanhi Cebu City mayor Tomas Osmeña maoy nipasiugda niini sa Cebu City niadtong siya nilingkod sa tuig 2016.

Ang mga tambal nga gipanghatag para sa diabetes, hyper-tension ug uban pa base sa resetang mapresentar ngadto sa mga barangay health workers.

Dili lalim ang masakit karon tungod sa kamahal sa tambal  samot na kun mahospital. Ang maintenance medicines makatabang pagpalahutay sa huyang na nga mga lawas sa mga senior citizens.

Apan kun walay ikapalit, dako kaayo og matabang kining plano ni acting Cebu City Mayor Raymund Alvin Garcia nga posibleng pagpabalik niini.