Pilde ang maglagot

Niulbo ang kaspa ug niaso ang ilong sa mga senador kang Alice Guo atol sa hearing niadtong adlaw'ng Lunes kay wala gyud silay nadawdaw gikan ni Alice sanglit maantigo naman kaayo kining molihay sa mga pangutana nga magpalaban dayon sa iyang katungod batok sa self-incrimination. Bisan giunsa nila og galing sa pangutana napakyas gyud silang tanan.

Sa kadugay nga paghuwat sa mga senador nga subling maatubang si Guo, daw gibuboan sila og tubig nga igo ra gipalagot niini bisan og gihimo na nila ang tanan aron malugit ang gusto nilang masayran. Sa sultada kagahapong adlawa, tinuod lang ang nakadaug si Alice Guo kay nilampos man siya sa pagpalagot sa mga senador.

Tungod kay wala nila malugit ang gustong makuha gikan sa baba ni Alice, gi contempt nila kini hangtud mahuman ang proseso ug makuha nila ang ilang gustong tubag.

Wala gyud kiniy epekto ni Alice kay arrested naman siyang daan tungod sa patongpatong kaso nga iyang giatubang bisan ka pila pa nila i-contempt.

Pinugsanay ang estilo sa imbistigasyon sa Senado nga ang ilang imbitahan nga resource person  mobati gyud og kahadlok kay sa higayon nga dili sila makauyon sa tubag dali ra man nila magamit ang ilang gahum pinaagi sa pag-contemp niini dayon prisohon hangtud matagbaw sila sa ilang gustong mahitabo. Hinuon kadtong mga bakakon ug magsubisubi ug manginsulto sa mga senador angayan ra pud i-contempt aron makatilaw sa ilang ka bastos.

Ang imbistigasyon sa Senado gitumong in aid of legislation kong unsay makuha nila magamit nila sa pagpanday sa balaod nga maoy ilang papel isip mga magbabalaod. Apan usahay malimot naman sila sa tumong nila sa pagdapit sa mga resource person nga ilang giimbitahan. Silang tanan motingog nga gamiton ang kaisog, mangasaba pa aron mahadlok kanila ug motubag nalang kay nadala sa gulat o hulga sa mga senador.

Nasayod silang tanan nga mopatigbabaw gyud ang katungod sa tawo sa pagpakahilom nga nalatid sa Konstitusyon ug walay si bisan kinsa nga molabaw niini bisan pa ang mga senador ug presidente. Apan daw gibalewala nila kini tungod kay sila man ang anaa sa gahum busa walay arang kanila kon ilang supakon ang nalatid sa balaod.

Subo palandungon nga sila ang mga tawo nga tigpanday sa balaod apan sila mismo molapas niini kong matandog na ang ilang garbo nga honorable ug dili tahoron sa mga tawo nga feeling nila ubos kanila ug labaw nga ila nang gihukman daan nga makasasala. Hangtud makombikto ang usa ka tawo maisip gihapon kining inosente. Sakit kini nga kamatuoran apan unsaon man nga aduna man kitay balaod nga mopatigbabaw ug angayan sundon.