EDITORYAL - Bawal mopahiyom?

Miani og mga pagsaway gikan sa publiko apil na sa Senado ang nanggawas nga mga hulagway diha sa social media nga nagpakita sa dinakpang gitaktak nga Bamban mayor Alice Guo a Guo Hua Ping kauban sa mga opisyales sa gobiyerno nga nagngislit o daw malipayon.

Si Guo nadakpan didto sa Indonesia sa mga otoridad sa maong nasud human na-trace ang SIM sa iyang gigamit nga cellphone, human sa negosasyon sa gobiyerno sa Pilipinas ug sa maong nasud bukas nga gipasa sa maong nasud ang dinakpan.

Apan sa pagbiyahe palang kang Guo sud sa sakyanan, duna nay mga selfies ug groupies nga nahitabo tali kaniya ug sa mga opisyales sa National Bureau of Investigation, Bureau of Immigration, hasta pa gani si PNP Chief Rommel Francisco Dayleg Marbil ug DILG Secretary Benjamin Abalos Jr.

Daghan ang wala kauyon sa ilang mga pictures kay mura og gikan nagbakasyon ug naglipay-lipay ang grupo kauban si Guo nga maayo sab kaayong mipahiyom sa camera.

Sa dihang unang gipresentar si Guo ngadto sa media, nakasuot kini og pormal nga sapot inay nga orange nga t-shirt nga sagad ipasuot sa mga dinakpan ug wala sab kini nakaposas mao nga duna na say nanghinaway nga mga netizens, ilabi na nga pulos gihapon pahiyom ug ngislit ang maong giimbestigar sa Senado.

Si Guo nagatubang mga kaso may kalabotan sa nagpadayong imbestigasyon sa Philippine Offshore Gaming Operation didto sa Bamban nga gironda sa mga otoridad tungod sa human trafficking, torture, online scamming, ug uban pa.

Ang eksplinasyon hinuon sa mga hingtungdang opisyal kabahin sa ilang pagpahulagway kauban ni Guo nga silang tanan nag-smile, wala kini matud pa dautang kahulogan.

Nagpahiyom sila diha sa hulagway kauban ni Guo tungod kini sa ilang tumang kalipay nga sa kataposan nadakpan na gyud nila og balik ang pugante nga nakaikyas padung sa gawas sa nasud.

Bisan si Presidente Ferdinand Marcos Jr. midepensa sa taras sa maong mga opisyales kay para niya, normal lang tingaling malipay sa resulta sa ilang paningkamot.

Tingali sensitibo lang gyud kaayo ang mga Pilipino. Dapat gipahimutang sab sa maong mga opisyales ang sitwasyon o okasyon nga ang ilang kauban gikasilagan karon sa mga Pilipino.