Septiyembre 08, 2024: Ikakawhaag-tulo nga Domingo sulod sa tuig
Mga Pagbasa: Is. 35;4-7/Sal. 146/San. 2;1-5/Mk. 7;31-37
Maayong Balita
Atong nakita dinhi sa ebanghelyo karong Dominggoha ang laing milagro sa pag-ayo nga gihimo sa atong Ginoo ngadto sa usa ka tawo nga amang ug bungol. Atong nakita kining mosunod nga mga lihok ni Jesus. Gipahilayo niya ang Tawo gikan sa kadaghanan, iyang gituthoan ang iyang tudlo, gihikap ang dila sa tawo ug human niini iya gikulkog ang dalunggan. Nihangad sa langit ug nituwaw: Efata! Nga sa ato pa, maabli ka! Tuod man nakadungog ang maong tawo ug maayo na siyang mosulti!
Kasinatian
Pagpahilayo. Diha sa pagpangita sa atong kaugalingon usahay kinahanglan nga kita mopahilayo gikan sa kadaghanan aron mahimamat nato ang ang atong tinuod nga kaugalingon ingon man ang Dios. Tugotan nato ang Ginoo nga mohikap sa atong dila aron lunlon pulong maayo ang atong malitok. Ipakulkog nato ang atong mga dalunggan aron mahaw-as kini gikan sa pagdumili nga maminaw sa kamatuoran ug sa yangongo sa uban. Giniyahan ning maong kaamgohan kita makadungog dili lang sa atong dalunggan kondili sab sa atong kasingkasing.
Lihok
1. Hilom ug aninawa ang mga panghitabo sa imong palibot.
2. Sa dili ka pa mosulti pamalandongi daan kun makaayo ba kini o makapasakit sa pagbati sa imong mga kaigsuonan.
Pangamuyo
Tanan: Ginoo himoang maayo ug panalangin ang malibkas sa akong dila ug dili pamalikas. Maabli unta ang akong mga dalunggan sa mga panginahanglan sa uban. Ikaw nga buhi ug Hari Hangtud sa kahangturan.