Dear Atty. Divine,
Ang akong lolo ug lola namatay na ug aduna kini kabilin nga mga properties. Lima ka igsuon ang dapat magbahin sa ilang kabilin lakip na ang akong mama. Apan karon among nahibaw-an nga gibahin-bahin na sa mga igsuon sa akong mama ang mga properties nga wa ilakip sa bahin ang akong inahan. Matud pa sa usa sa mga igsuon ni mama nga dili na daw angay’ng bahinan akong inahan kay usa na siya ka American citizen ug atoa na magpuyo sa America. Ang akong pangutana kun husto ba kining gibuhat sa mga igsuon sa akong mama? Unsay angay nga buhaton sa akong mama aron makuha niya ang iyang bahin. Daghang salamat.
Pia
* * *
Dear Pia,
Bisan tuod kun ang imong mama usa na ka American citizen, mamahimo gihapon siyang maka inherit og makapanag-iya og yuta. Kini basi sa Section 3 og section 8 sa Article XII sa atong Constitution, nga nagkanayon nga ang ang makapanagpanag-iya og yuta sa Pilipinas limitado lang sa mga Filipino ug kanhi Filipino apan aduna kini exemption, kadtong mga langyaw makaangkon lang og yuta sa Pilipinas kun pinaagi kini sa legal inheritance. So, sa kaso sa imong mama, American citizen na siya apan nagpabilin ang iyang katungod nga maka-inherit og property sa Pilipinas basi sa atong balaod. Ang maayong buhaton sa imong mama mao ang pagpakigsabot sa iyang mga igsuon ug sa pagpangayo sa iyang bahin. Kun dili gihapon siya hatagan sa iyang share then mamahimo na siyang mo hire og lawyer aron maoy mohimo og mga legal nga lakang. Thank you and God Bless!
Atty. Divine
* * *
Alang sa inyong pangutana, palihug lang sa pag-email sa flores_ divina@yahoo.com ug akong tubagon ang inyong mga pangutana pinaagi sa akong column matag Miyerkules, Sabado ug Domingo.