Hugtan pa ang pag-amping sa "ber months"

Wala ra matagdi ang panahon nakaabot na pud kita sa "ber months" diin maoy sinugdanan sa labing taas nga selebrasyon sa Pasko dinhi sa atong nasud. Wala na nagpaukon-ukon pa si Jose Marie Chan makaplastada na gyud siya ug duna nay kagawasan nga manaygon. Bitaw dali ra kaayo moligid ang panahon nga dili na gani mabantayan kon unsay nahitabo sa atong palibot ug mismo sa atong kinabuhi.

Subay sa pagsulod na nato sa panahon nga maoy gipaabot sa uban, duna usay angayan nga pangandaman ilabi na ang mga panghitabo mahitungod sa kahapsay ug kalinaw sa atong dapit kay lagi kining "ber months" duna man usay oportunidad sa panikaysikay sa atong mga kaigsoonan ug sa susamang higayon kini usab ang panahon nga moatake ang mga dautang elemento kay mo-take advantage man pud sila sa mga establisemento nga luag kaayo ang seguridad.

Atol sa tigom sa mga sakop sa media uban sa Deputy City Director for Administration sa Cebu City Police Office nga si Lt. Col. Janette Rafter nga mas gipahugtan pa sa kapolisan ang mga proactive measures aron dili makapanukad ang mga dautang elemento kon duna man silay giplanong himoon.

Gi-penetrate nila ang bisan asa nga suok sa komunidad uban sa pakig-alayon sa opisyal sa barangay ug sa katawhan mismo aron matiktikan kinsa ang mga nagpahipo nga mga kriminal nga nagpaabot og higayon nga makapamiktima.

Dili man hinuon perpekto ang mga pulis sa ilang gimbuhaton kay malutsan man gihapon sila sa mga kriminal sama sa nahitabong tulus sa duha ka mga tindahan og alahas sa Carbon, apan nagsilbe kini nga pagpukaw kanila nga dili gyud kakompyansahan ang mga dautan nga ang mga tinugyanan ra usab sa balaod ang bantayan.

Busa karong "ber months" season lauman nalang daan nga dunay mga unwanted visitors nga mamasko sa matag lugar nga angayang bantayan ug kong masakpan ipalangaoy sa dagat balik sa ilang gigikanan, kong makaabot lagi silang gaginhawa pa.

Dili lang magsalig sa mga pulis ilabi na ang mga establismento ug sila na mismo ang mopahugot pagbantay sa ilang negosyo aron dili sila mabiktima sa mga kriminal.

Kong mahimo modugang sila og mga gwardiya ug dili lang magsalig sa CCTV kay dili man na makadakop diha diha dayon ang CCTV.sa mga tulisan, makatabang lang na pag-ila sa mga kriminal.

Aron merry ang atong "ber months" magtambayayong kitang tanan nga dili kini maguba sa mga tawong walay konsensiya.