Dear Atty. Divine,
Ang akong amiga nangutang nako og kwarta kay iya daw ipuhunan og negosyo nga water refilling station. Nagpirmahanay mi og kasabutan nga after 2 years mosugod na siya sa pagbayad.
Niadtong Disyembre 2023, dapat na siyang mosugod sa pagbayad sa maong utang matag buwan apan wa kini niya buhata. Ako siyang gitawgan dili na motubag lakip na sa akong mga text.
Ang akong pangutana mamahimo ba nako siyang ikiha og estafa tungod sa iyang pagdumili sa pagbayad sa maong utang? Daghang salamat
Liza,
* * *
Dear Liza,
Ang imong ma file nga kaso mao ang collection of sum of money ug dili ang estafa nga usa ka criminal offense. Kini tungod kay wa man mag-involved og deceit, false pretenses o pagpangilad ang iyang gibuhat nga usa sa mga elements sa estafa.
Gani aduna moy gipirmahan nga kasabutan labot sa iyang pagpangutang. Ang maayo nimong buhaton mao ang pagpadala og demand letter pinaagi sa imong abogado alang kaniya sa pagbayad sa maong utang.
Kun dili siya mosanong niini mamahimo kang mopasaka og reklamo ngadto sa barangay diin siya nagpuyo. Kun di mo mahusay sa barangay then adto ka na modangop sa korte. Thank you and God bless. -- Atty. Divine
* * *
Alang sa inyong pangutana, palihug lang sa pag-email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.