EDITORYAL - Mas maayo tingali motabang ang LTO

Gipahibalo sa Land Transportation Office (LTO) sa Region 7 nga sugod karong Septiyembre 1, 2024, manakop na sila og mga sakyanan ug motorsiklo nga nigamit og mga dili otorisadong plaka o improvised plates.

Ang maong kamandoan gibase sa bag-ong memorandum, Circular No. VDM-2024-2721 nga naglatid kabahin sa paggamit og improvised ug temporary motor vehicle o motorcycle plates sa tibuok nasud.

Sa pagkakaron, aduna matud pa 300 mil ka mga plaka sa LTO-7 nga wala pa gihapon kuhaan sa mga tagiya. Nganong wala man ipakuha sa mga dealers?

Responsibilidad sa mga nanagiya og sakyanan ug motorsiklo nga otorisadong plaka ang nakakabit sa ilang mga units apan adunay mga babag para mabuhat kini.

Usa na niini kani mismong car ug motorcycle dealers kay sila maoy nagparehistro sa mga brand new nga units nga ilang gibaligya ug sila maoy naglihok sa rehistro ug sa plaka niini.

Apan matag pangutan-on sila kun hain na ang ilang plaka sagad nilang tubag, wala pa daw ma –release sa LTO.

Mayoriya sa mga sakyanan ug motorsiklo nga mahalin sa mga dealers inutang ra. Ang dealers pa gihapoy tagiya ani hangtud dili maimpas og bayad sa nangutang.

Aduna pa gani mga motorsiklong sobra na usa ka bulan napalit  apan wala pa ma-release ang rehistro kay dunganon ra diay sa ubang nahalin nga units gikan sa uban pa nilang branches ang pagparehistro niiini sa LTO.

Dili ni maingon niini kun wala anara sa mismong taga LTO. Maayo pud tingali nga mangutikuti sila kun kanus-a ni napalit ang mga units ug mangutana pud sa dealers nganong karon pa girehistro nga dugay naman diay nahalin. Diha palang daan, medyo agrabyado na pirme ang mga nakapalit.

Kadaghanan ra ba ning nipalit og mga sakyanan o motor para gyud gamiton sa pamilya, gamiton sa trabaho o sa panginabuhi.

Dili ba mas maayong tabangan nalang sa LTO ang mga nakapalit aron pugson ang dealers nga pangunayan og kuha ang ilang mga plaka sa ilang buhatan ug ipakuha nalang sa mga nakapalit?

Imbes mangugi og dakop, mas maayo tingali mangugi sila og tabang kay daghan karon sa nanginabuhi gamit ang motor nga temporary plates pay gigamit.