Pagpakabana sa mga Sugboanong magtutudlo
Alang sa umaabot nga eleksiyon, ang mga magtutudlo sa Sugbo, ubos sa Department of Education Teachers’ Union, miawhag sa kauban nilang magtutudlo, mga election workers, ug sa publiko mismo, nga magbinantayon aron pagseguro nga dili kamansahan ang 2025 midterm elections.
Nindot ni, kay mitingog na ang atong mga magtutudlo. Hinaut nga ma-nationwide kini nga panawagan, ug mo-react usab niini ang katawhan mismo, ang electorate, ug magbinantayon.
Kini, aron masanta kadtong adunay dautang mga laraw nga ilang buhaton aron mudaog.
Nganong mitingog na man sila? Matud dinhi, “this follows the recent issue involving Smartmatic, the former poll technology provider. The teacher’s union stresses the need for technology that is trustworthy and accountable.”
Kini karong puli sa Smartmatic, ‘accountable’ ug ‘trustworthy’ ba kini? Manubag ba unya sila kon adunay mga pangutana bahin sa resulta ug pag-iphanay na unya sa mga boto?
Ato kining kutluon: “Past experiences with Smartmatic’s VCMs have raised significant concerns, particularly during the 2022 elections, where over 1,800 machines reportedly malfunctioned, affecting approximately 1.1 million voters..” Mao ba? 1.1 million voters ra ba?
Matud ni DTU Visayas president Remus Marinas, master teacher II sa Apas National High School, mibutyag nga sa Sugbo lamang, adunay 2,000 ka magtutudlo ang sakop sa teachers’ union, gikan sa mga tunghaang publiko. Kadaghan ini nila, hinaut magkahiusa lang gayud sila sa ilang mga prinsipiyo, mga tinguha, ug kawsa. “Gihisgutan usab ni Marinas ang kasinatian uban sa Smartmatic dinhi sa Cebu, nga mo-bogged down ang ilang machines, dili na makabasa sa mga balota, dali rang mo-overheat, ug hinay ang transmission sa resulta.
Gumikan niini, ug ubang mga isyo, ang DTU mi-encourage sa tanang magtutodlo, mga election workers, ug publiko mismo, labi na ang electorate, “to remain vigilant as the sanctity of our democratic process depends on each of us.”
Bitaw, sa ato nang gibalik-balik dinhi, sagrado kaayo ang atong katungod pagpili. Ug ato lamang kining yama-yamaan ug dula-dulaan. Maoy hinungdan nga gibanggabaan na tingali kita.
* * *
Ug aniay maayong balita. Giingon dinhi nga “The Philippines gets an ‘A’ credit ratings.” Nindot paminawon no? Literally, nagpasabot kini nga makapatuyang na kita’g pangugtang, dili kita nila balibaran, ug naka-boost kini sa confidence ug pagsalig sa mga foreign investors.
Kinsay nagsulti niini? Ang Japan-based nga Rating and Information Inc. Unsay ilang gibasihan sa rating? “How much money, how much property, debt a borrower has, and how the borrower has paid past debts.”
Sa ato pa, duna kitay igong kwarta, kabtangan, existing nga utang, ug giunsa nato pagbayad ang past due nga mga utang. We are a good borrower. Mao nga ‘A’ credit rating ang gihatag nganhi kanato.
Ug nia pa: “UK unlocks P370 billion credit facility for Philippines.” Literally, gibuksan, gi-unlock ang kandado pagpautang sa Pilipinas. So makapangutang usab kita gikan sa United Kingdom.
Una kining financial transaction o accommodation sa Europe nganhi sa Pilipinas, ug ilang paningkamotan nga magpadayon ang maayo nilang relasyon nganhi sa atong nasud.
Sa laktud, kining ilang pagsalig kanato, nagpasabot nga mituo sila nga aduna kitay kapasidad pagbayad sa mga utang.
- Latest