Sila atua na samtang ikaw, Banat, 30 na

August 23, 1994, natawo ang The Freeman (TF) Banat News sa kadalanan sa siyudad sa Sugbo. Nadungog ang kalab-as sa mga uha niini sa mga Sugboanong magsusulat, kinsa anha magtapok kanunay sa gamay'ng tindahan sa aseras ni anhing Ramon S. Arong (writer sab) diha sa may dalan Colon. Ug sa tumang kahinangop, gikugos-gibukhad-gibasa nila kini.

Niining tuig 1994, ang Bisaya magasin nga gipatik sa Liwayway Publishing Incorporated, Manila, mao na lamay Binisayang mantalaan nga kapahungawanan sa nag-uros-uros nga biga sa pagpanulat sa mga Cebuano-Visayan writers sanglit ang kanhi mga makalingaw usab nga magasin sama sa Suga, Alimyon ug uban pa, hingpit na mang nangahanaw. Busa gikalipay sa mga magsusulat, karaan man, o mao pay pagkat-on, ang pagkahimugso niining maong tabloid. Ug usa na ako kanila.

Nindot ang estratihiyang gigamit sa TF Banat News’ editor ug publisher. Mga talagsaon ug kahibulongang hitabo mao g'yuy pirme nilang ibandera sa front page diha sa gipangladlad ug gipangbitay sa newsstands nilang mga hulad sa TF Banat News. Samtang sa sulod, daw nagdalit og halohalo or mixed fruits: Pasiaw, Tinagsip Balita, Pulongbay, Opinion, Sugilanon, Showbiz, Sports, etc. Kon naha-Main Gaisano pa, ‘One Store has it all!’

Bisan ang bahin sa pamayad nga mapatik, gihimo kining coffee cream sa mga magkatapok nga writers. Gani, dihang may laing local publishing nga misugod pod pagpublikar og binisayang mantalaan, aduna dayoy magsusulat mipahibalo nga mas dako kuno ang honorarium niini sa mapatik nga sugilanon.

Apan bisan pa niini, ubay-ubay gihapong premyadong writers ang tigtampohan og mga Sugilanon sa TF Banat News. Sanglit, dili kuwarta maoy ilang giapas, kondili, unsaon nila pagtabang sa pagpalambo sa atong Kultura-Dilang Binisaya aron kini dili mailog sa mga langyawng pinulongan, nga maoy dalaygong tumong niining atong manggihunahunaong tabloid.

Ang kadali ra gayud sa pagpangaligid sa panahon. Diin, kon atong lingion ang nangagi, ubay-ubay nang magtatampong Visayan writers, apil na ang friendly-reader-news Editor-in-Chief-publisher Juanito V. Jabat kang kansang mga hiyas kapanaminan, ang atua na! Samtang ikaw, TF Banat News, sumad karong adlawa, mohingkod nang 30 anyos ug misamot katahom, kabatan-on ug kamasaaron.

Padayon sa imong paglawig, our dear tabloid. Padayon! Ug Happy 30th Birthday!