Bato sa sapa gipintalan

Nahimong kontrobersiyal ang gihimo sa usa ka konsehal sa Barangay Lusaran nga gipintalan niini og lainlaing kolor ang mga bato sa dakong sapa sa ilang dapit.

Ang mga environmentalist nakasaway kaayo sa gihimo sa konsehal kay nakalaksot na man hinuon kini sa pagtan-aw sa mga bato sa sapa.

Kon tan-awon nimo sa layo, susama na hinoon nga dunay mga nilabhan nga gihapnig sa mga bato aron paughon sa kainit sa adlaw.

Imbes makapanindot, bati kaayo tan-awon nga gipintalan og lainlaing kolor ang mga bato sa sapa. Tungod kay gisaway man ang gihimo sa konsehal, napugos siya pagpapas niini.

Mga tanod sa barangay ug mga volunteers, nagtinabangay sa pagpapas sa pintal nga maayo na nga pagkapilit unta sa mga bato.

Dili sayon ang pagpapas sa pintal mao nga madugay pa gyud kini nga mahuman. Ang pagtulon-an nga makuha niini mao nga dili gyud maayong usbon nimo ang butang sa kinaiyahan.

Kanindot ba tan-awon sa mga dagko kaayong bato nga sa ubos anaa ang kusog kaayo nga tubig sa Lusaran River. Apan nakasabot ko nga way daotang katuyoan ang konsehal.

Ang konsehal nga may pagka babayen-on, gusto lang nga monindot tan-awon ang sapa, ug nga maka-attract unta og mga turista nga mangadto sa ilang dapit.

Sayop lang ang iyang gihimo, apan angay ra siyang pasayloon. Sa ubos niining dapit sa Barangay Lusaran nga gipintalan ang dagkong mga bato sa sapa, anaa mahimutang ang lagoon ug ang planta sa JE Hydro & Bio-Energy Corporation nga nagkuha og tubig para sa MCWD.

Ang JE Hydro maoy usa sa labing dako nga supplier og tubig sa MCWD kay 30,000 cubic meters (150,000 ka baril) nga tubig ang gisuplay niini kada adlaw.

* * *

Mga amigo nako ang nagdumala sa PROBE Team sa Cebu City nga sila si retired General Aderson Comar ug si Sir Kevin Sanchez.

Kapin sa usa ka gatus ang mga kawani nga sakop sa PROBE Team nga ang tahas mao ang paghawan sa mga public places nga giukopar na sa mga private persons.

Sa nga’n pa lang daan, Prevention, Restoration, Order and Beautification Enhancement (PROBE). Apan kon mosuroy ka sa lainlaing dapit sa siyudad, makita nimo nga daghang aseras nga para kaagian unta sa mga tawo, giukopar sa mgatag-iya sa balay nga anaa mahimutang daplin sa karsada.

Dili na tingali angay’ng isulti pa kon asa kini dapit mahimutang nga dunay angay’ng himoan og aksiyon. Kon abtikon lang ang mga mata, makita ra kini dayon.

Unta, pahimuslan nila ni Sir Comar ug Sir Kevin ang daghang sakop sa PROBE aron malimpyo ang atong siyudad.