Sampoli dayon

Mipasidaan si Justice Secretary Remulla sa mga Immigration personnel nga adunay kalambigitan sa pag-eskapo ni Bamban Mayor Alice Guo nga mopatim-aw ug mosulti sa kamatuoran kay kon dili “adunay mga ulo nga moligid.”  Gitahasan usab ni Remulla ang NBI ug ang Bureau of Immigration sa pag-imbestigar sa misteryo nga naglimin sa pagkagiw ni Mayor Guo.  Ayaw na lang pagdahum nga adunay mopiyait Mr. Secretary.  Kon ugaling adunay mapamatud-an nga sad-an, pahamtangi dayon sa silot.  Matud pa sa akong amigo, “Ayaw na ana’ng hulga-hulga nga punggotan nimo sa ulo ang sad-an. Sampoli dayon.”  Muleeng!

Pundo ra’y intelligent

Alang sa DOJ, legal ang paghatag sa kagamhanan og P10 milyones nga ganti alang niadtong makahatag og impormasyon sa nahimutangan ni KOJC leader Pastor Apollo Quiboloy.  Mahinumduman nga gikwestiyon ni KOJC Executive Secretary Eleanor Cardona ang maong paghatag og ganti tungod kay dili pa man konbiktado ang ilang leader.  May punto ang pagkwestiyon ni Cardona.  Dako man unta ang pundo nga gigahin alang sa intelligence fund sa mga ahensya sa kagamhanan, apan nganong dili man mapalgan ang tawo nga gipangita.  Daw husto ang panahom sa akong amigo nga, “Ang pundo ra’y “intelligent,” apan ang mga kawani way kabangkaagan.”  Madahaan!

Hata ba lang

Matud pa ni Bise Presidente Sara Duterte, adunay mga sakop sa Kongreso nga naglaraw nga mopasaka og impeachment complaint batok kaniya.  Dugang pa sa Bise Presidente nga buot sa ubang mga kongresista nga ihulagway nga ang mga Duterte corrupt ug hulga sa tinguha sa uban sa padayon nga paghupot nila sa gahum.  Inantigo ang pagbutyag ni Sara sa maong impormasyon bisan wala pa kini katin-awan.  Gawas pa, mora’g wala na’y panahon nga masang-at ang maong impeachment complaint tungod kay nagsingabot na ang midterm elections.  Kini’ng gibuhat sa Bise Presidente nahaum sa atong pagya nga “Hata ba lang.”  Fezteleern!

Maanad ra sa baho

Gikataho nga ang mga lumolupyo sa Sitio Kainsikan, Barangay Binaliw, Cebu City nagreklamo sa kabaho sa Materials Recovery Facility ug Sanitary Landfill sa maong lugar. Dugang pa sa taho, nasinati sa mga lumolupyo ang kabaho sa ilang lugar sukad pa niadtong tuig 2018. Apan sayod kita nga kon maghisgot kita’g landfill, dili kalikayan nga adunay baho nga masinati.  Duha ra ang mahimo sa mga taga-Sitio Kainsikan: una, kon di sila maka-agwanta, aw mobalhin sila; ikaduha, sagopon nila ang linya sa awit nga nagakanayon: “ayaw lang kabalaka kay madugay maanad ka ra (sa baho).” Saoonz!

Palanggana ug baso

Aduna na’y natala nga 396 ka tawo nga namatay sukad sa Enero 1 hangtud Agosto 10 karon’g tuiga gumikan sa sakit nga dengue.   Tungod sa gidaghanon sa kaso sa dengue, adunay purohan nga modeklarar si Health Secretary Ted Herbosa nga aduna na’y “dengue outbreak” sa nasud.  Dili angay mokumpiyansa ang katawhan sa dengue.  Busa angayan nato’ng panagan-an ang maong balatian kay matud pa sa akong amigo’ng intsik, “Kon wa ka palanggana (panagana), baso (magbasol) ba.”  Pagkatoytoy!