Dili updated ang NEDA

Gitugan ni National Economic Development Authority ( NEDA ) Secretary Arsenio Balisacan ngadto sa mga Senador atol sa gipahigayon nga public hearing sa gipangayong budget sa iyang buhatan alang sa tuig 2025 nga sa kantidad nga P64 kada adlaw o P9,581 kada buwan dili na makonsiderar nga food poor o pobre sa pagkaon ang pamilya nga adunay lima ka mga sakop.

Kini basi sa kuwentada sa Philippine Statistics Authority (PSA) sa menu nga kaonon alang sa pamahaw, paniudto ug panihapon nga maoy gikinahanglan aron maghatag kini og saktong enerhiya ug nutrasyon sa lawas.

Ang pamahaw gilangkoban kini sa scrambled nga itlog, kape nga may gatas, ug kan-on nga humay o mais. Ang paniudto gilangkoban kini sa mongos, beans nga may kamongay, buwad, saging ug kan-on nga humay o mais samtang ang panihapon gilangkoban sa piniritong isda, tinolang karneng baboy, utan, kan-on humay o mais ug pan o lagotmon alang sa snacks.

Apan gamit ang maong menu sa pagpamalit sa merkado ang tanan misumada og P174 wala pay labot niini ang bugas, asin ug mantika.

Ang PSA ug ang National Nutrition Council (NSC) miangkon nga dili gayod igo sa rekomendadong energy ug nutrients alang sa lawas ang P64 nga pagkaon sa usa ka adlaw.

Dinhi makita nato nga ang pagtuon nga gihimo sa PSA ug NSC alang lang sa compliance ug dili aron makahimo og saktong mga patakaran nga pagahimoon.

Kay para lang compliance ang gihimo nga report sa PSA ug NSC, ang resulta dili kini updated.

Kay dili updated sa saktong datus, dili pod mao ang mahatag nga kasayoran ngadto sa publiko. Resulta nahimong kingkoy si NEDA Secretary Arsenio Balisacan atubangan sa mga Senador.