Maayong Balita
Gihimong literal lang kaayo ang pagsabot sa mga tawo nga naminaw sa Ginoo kalabot sa iyang diskurso sa pan sa Kinabuhi. Malisod dawaton nga mokaon sa unod aron lamang makabaton og kinabuhing dayon. Kining maong pagtulon-an nakahalin og dugang panaglalis ug gani tungod niini daghanan sa iyang mga sumusunod nga nibiya kaniya ug wala na gyud mokuyog sa iyang panaw.
Kasinatian
Ang atong mga katiguwangan naanad ining paghalad og mga pagkaon ngadto sa mga espiritu ug mga elemental sa pamasin nga makadawat sila og daghang ani. Sa pagpugas mohimo sila niini. Gitawag kini og dulot. Nunot usab niini pagahimoon usab ang paghalad sa mga manok o baboy nga ugis nga human og ihaw ibutang sa halaran apan walay asin. Human sa ritwal lutoon kini ug anha pa timplahan. Walay kalibutan ang atong mga katiguwangan nga ang paghimo sa ingon usa man ka pamaagi sa pakiglambigit sa kalibutan sa mga Espiritu.
Ang akto sa pagkaon sa mga pagkaong hinalad usa man ka pakighiusa. Ang ritwal mismo usa naman ka matang sa pakighiusa. Diha sa talad kan-anan mga dapit nga atong giduaw nakighiusa kita sa mga tawo nga nagdapit kanato ug atong gihatagan nato og bili ang maong pagdapit. Sama sa Sagrada Eyukaristiya ang Ginoo mismo ang nagdapit kanato. Sa matag kalawat nato kaniya, ang Ginoo nahimong usa kanato ug kita nahiusa kaniya! tataw kaayo ang giingon nga unta mamahimo kitang sama sa atong gikalawat.
Lihok
Ang Sagrada Eyukaristiya dili lamang usa ka Ritwal hinunoa, usa kini ka pakig-ambit sa panalangin sa Dios nga angayan sab natong ipaambit sa mas tataw nga pamaagi diha sa atong inadlaw adlaw nga pagkinabuhi.
Pangamuyo
Pangamuyo
Tanan: Ginoo nangita kami sa matuod nga kalan-on, hupnga kami sa imong makaluwas nga lawas ug dugo himoa kaming angayan nga mopadayon kanimo sulod sa among kinabuhi.
Ipamulong lamang ug mamaayo kami. Ang imong lawas ug dugo mamahimo untang among bawon ug pagkaon alang sa kinabuhing dayon. Ikaw nga buhi ug hari hangtud sa kahangturan. Amen.