Parking sa TOPS wa nay bayad

Kon senior citizen ka nga magdala og sakyanan ug mobisita ka sa TOPS, kanang suroyanan sa bukid sa Barangay Busay, dili ka na mobayad og parking fee nga P50 kon taga Cebu City ka.

Gireklamo nako sa Office of Senior Citizens Affairs (OSCA) ang tagdumala sa TOPS tungod sa wa nila pagtuman sa ordinansa nga ang mga senior citizens dili na pabayron og parking fee.

Ang akong maguwang ug ang iyang asawa nga parehong mga senior citizens, miadto sa TOPS kaniadtong Hulyo 19, ug sila gipabayad gyud og parking fee bisan og giingnan nako ang teller nga kalapasan ni sa ordinansa sa siyudad.

Matud sa manager sa TOPS nga wa kuno sila masayod sa ordinansa sa siyudad. Dihang gisuwat nako dinhi sa lindog, unya mireklamo ko sa OSCA, gi-search nila sa internet ug diha pa kuno sila masayod.

Apan matud sa manager nga tulo ra ka oras ang tagal nga dili makabayad og parking fee ang senior citizen. Giingnan siya sa hepe sa OSCA nga si Atty. Homer Cabaral nga dunay bag-ong ordinansa nga libre na gyud ang parking sa mga senior citizens nga taga Cebu City.

Kon ang senior citizen dili taga Cebu City, kay mailhan man sa iyang ID, aw mahimong dili libre ang ilang pag-parking. Dunay abogado nga mireklamo kuno kay nahibawo sa ordinansa, apan way nahimo kay mibayad ra man.

Karon, dili na sila makabayad, Kon mohimo gihapon og kalapasan ang management sa TOPS, pahibaw-a ko kay pamultahon nato sila, ug kon magsige gyud, ipa-revoke nato ang ilang business permit.

* * *

Nalipay ko kay giyam-iran lang ni Presidente Bongbong Marcos ang awhag kaniya sa mga Senador nga isuspenso usa sa pagpatuman ang PUJ modernization program.

Kining mao nga mga senador wa gyud maikog sa mga tag-iya og PUJ nga mituman sa mando sa kagamhanan nga magbag-o na sila og units, ug gipamaligya’g barato ang ilang karaan nga mga sakyanan aron pagtuman sa kamandoan.

Karon, gusto sa mga Senador nga ipasuspenso ang pagpatuman sa modernization program. Wa sila k’yapi? Gusto nilang mopadayon pagbiyahe ang mga kagang-kagang nga mga PUJ?

Mga multicab nga gipugos pagputol ang chassis, unya gisumpayan aron motaas ug makapakarga og daghang pasahero apan mag-aginod sa karsada kay gamay ang makina ug bug-at ang sakyanan?

Gusto nila nga magpadayon pagbiyahe ang mga PUJ nga mag-abot ang mga tuhod sa mga pasahero? Wa man gud sila makasuway nga mosakay og PUJ mao na nga pataka lang sila’g himo’g hukom.

Maayo unta og makat-on sila’g leksyon karon nga gibasura ni Bongbong ang ilang awhag.