Sakit man paminawon nga niining administrasiyong Marcos nauso ang paghimog tinumotumong estorya sa iyang mga piniling dagkong lider aron lamang tamnan og sala ang gikontrahan nilang mga kaaway sa politika ug unya paatubangon sa Kongreso ug Senado aron ipakulata og trial by publicity, diin wala pa gani maimbistaghi sa korte, gihukman na nilang sad-an ug ibandilyo pa gayod nga ‘Wanted’ uban ang minilyong reward nga gipatong sa matag ulo, angay na lang natong agwantahon kay mao man ang reyalidad.
Bisan si Bise Presidente Sara ‘Inday’ Z. Duterte biktima usab sa pagkabakakon sa mga appointed officials ni Presidente Bongbong Marcos (PBBM). Gikan sa Department of Interior and Local Government ngadto na sa Department of Justice, pastilan, wala nay mapili!
Rason, nganong gipadad-an ni Inday og open letter si Phiippine National Police Chief Gen. Rommel Francisco Marbil kay wala na siya makaantos sa kabakakon niini. Niay pipila ka tipik:
“Ngunit may problema ako sa mga kasinungalingang ipinapahayag sa taong bayan – lalo na kung ang kasinungalingang ito ay galing mismo mula sa pinakamaitaas na opisyal ng kapolisan.”
Gitumbok ni Inday ang iyang pagkadismaya, dihang gipahibalo ni Rommel ang publiko pinaagi sa press conference, nga mihangyo siya sa posibleng pagkuha sa 75 ka pulis nga naasayin sa Office of the Vice President (OVP) kay gikinahanglan na sa National Capitol Region ground. Ug miuyon kuno ang OVP.
Apan bakak diay. Kay wala gyoy request nga nadawat ang opisina ni Inday. Ikaduha, walay katungod si Rommel pagpanghilabot sa mga security personnel nga pulos mga pinili ug sinaligan ni Inday, kinsa nakasilbe sa mayor pa si Tatay Digong ug sa na-mayor na si Inday sa Davao City. Kwestiyonablig utok si Marbil. Busa may warning shots ang Open Letter ni Inday, diin walay date, walay opening and closing salutatory remarks ug labaw sa tanan, walay PNP chief General nga nahisulat. Kondili, ‘To Rommel’ ra.
Kay para ni Inday, dili kini angay tawgog PNP chief. Hinungdan, sa iyang Open Letter, gihukasan-huboan na ni Inday si Rommel. Wala gyod niya tatakig PNP chief General ang pangalan. Kutob ra sa ‘To Rommel’ nga alang sab nako, maoy haom!
So, fasten your seatbelt, Rommel!