Duha ka alahasan ang gitulis

Wala gyud alang-alanga sa mga tulisan ang ilang operasyon sa dakbayan sa Sugbo, duha ka nagtapad nga jewelry store ang ilang giransak kagahapong adlawa diin nahimo nila ang krimen sulod lang sa napulo ka segundos. Nakuhaan og CCTV footage ang ilang robbery operation ug murag kilat oy ang ilang mga lihok.

Unom ka mga lalaki nga armado og long firearms ang mihimo sa pagpanulis nga smooth kaayo ang ilang operasyon. Adunay lalaki nga nagdala og mubo nga armas nga mition sa mga tawo sa gawas, dayon adunay usa nga nagdala og long firearms nga maoy mipasulod sa mga tawo gikan sa gawas ngadto sa alahasan samtang adunay tulo ka mga tawo nga nag-helmet nga maoy mikuha sa mga naka-display nga mga alahas sa estante ug gisulod sa ilang dala nga bag. Murag bugas nga gisulod sa bag ang nagkadaiyang alahas.

Dungan nilang giransak ang tapad nga jewelry store ug gitilok usab ang naka display sa ilang estante ug dayon sibat sakay sa mga gate-away vehicles dala ang ilang kinawat. Pag abot sa mga pulis wala na ang mga tulisan.

Bana bana nga nakuha sa mga tulisan ang moabot sa P10 milyones sa unang alahasan samtang kwatro milyones usab ang nakuha nga balos sa mga alahas sa ikaduhang jewelry store. Mora’g nakadaug pud og gold medal kining mga tulisana kay tiba tiba sila sa mga bulawan nga ilang nakuha.

Pagkakursonada naman lang gyud niining mga tulisana kay ang dapit dugokanan man sa mga tawo, daplin sa karsada dapit sa Freedom Park ug atbang ra sa dakong unibersidad, midyo duol ra pud ang estayonan sa kapolisan sa Carbon. Pero tungod kay planado kaayo ang ilang ma lihok maglisod og apas ang mga pulis kanila.

Ang usa ka jewelry store walay security guard, samtang ang usa naa pero walay nahimo. Kinsa pud gud ang magpatugatuga sukol sa mga tulisan nga tag-as og armas segurado ra gyud nga mapatyan ang gwardiya kong nisukol siya.

Sa initial nga pakisusi sa kapolisan sa dakbayan sa Sugbo, nailhan na kuno nila ang usa sa mga suspek base sa kuha sa CCTV apan wala pa sila modetalye samtang nagpadayon pa ang ilang imbistigasyon. Unsa man ni nga grupo? Local boys ra? O ba kaha mga gikan sa laing dapit? kutob lang sa kita sa mga pangutana hangtud mogawas ang imbistigasyon sa kapolisan.

Sunod-sunod nga hagit ang naatol sa paglingkod sa acting director sa CCPO Col. Antonietto Cañete diin kining tulis ang pinakadako sulod sa duha pa lang ka semana sa iyang paglingkod.

Nataymingan ra gyud ang opisyal aning mga panghitaboa. Gihatagan siya og 48 oras nga masulbad ang krimen sa acting mayor sa dakbayan. Unsay mahitabo kaniya kong mapakyas? Atangan nato ang mosunod nga panid niining estoryaha.

Wala ba kini masagap sa intel sa atong kapolisan ug nganong nalutsan man sila? Hinuon bisan unsaon sa pagbantay nila apan duna gyuy higayon nga malutsan. Maayo unta kong masulbad kini sa labing dali nga panahon pinaagi usab sa abag sa katilingban.