Giangkon ni Darren Alderson Tejano Cui nga person of interest sa kasong pagpatay sa saleslady nga si Charina Relativo niadtong adlaw nga Biyernes, Agosto 2 ning tuiga sa Sitio Laguna, Bulacao, dakbayan sa Sugbo nga siya ang mipatay sa biktima. Kini ang giasoy ni Loreto Relativo, amahan ni Charina nga eksklutibo nga nahinabi sa Xfm 88.3 Cebu kagahapon sa buntag.
Gitug-an ni Noy Loreto nga ang maong kasayoran iyang nabati gikan sa mga polis sa Inayawan Police Station nga mibisita sa ilang panimalay sa Barangay Bulasa, Argao nga misulti kaniya sa dagan sa ilang imbestigasyon sa kaso.
Gitug-an usab ni noy Loreto basi sa asoy sa polis ngadto kaniya nga dili gayod tuyo ni Darren ang pagpatay sa iyang anak kun dili ang pagpahimulos lamang unta sa pagkababaye niini apan misukol kini maong iyang gituok aron mohilum apan iyang nahinaykan ug namatay.
Gisunog niini ang foam gamit ang butane gas aron makit-an sa mga tawo ang patay nga lawas ni Charina apan dali ra kining napawong maong ang buhok lamang niini ang nasunog. Basi sa Certificate of Death nga gipagawas ni Police Captain Mark Andrew Paran, Medico Legal Officer sa Police Regional Office-7, nga namatay ang biktima kay wala na kini makaginhawa tungod kay gituok gamit ang duha ka kamot.
Sa pagsuwat ning akong lindog nagpahigayon pa og pakigpulong sa mga tigbalita ang hepe sa kapolisan sa dakbayan sa Sugbo ug si Cebu City acting Mayor Raymond Alvin Garcia. Sa maong pulong gikonpirmar sa hepe sa kapolisan sa dakbayan sa Sugbo ang tanan nga giasoy ni noy Loreto Relativo sa eksklusibo nga pakighinabi kaniya sa Xfm 88.3 Cebu nga miangkon si Darren sa krimin nga iyang nahimo.
Gibutyag sa hepe sa kapolisan sa dakbatan sa Sugbo nga mihimo og extra-judicial confession si Darren ang suspetsado sa krimin.
Manghinaut lang ko nga ang giingon nga confession sa suspetsado nahasubay sa lagda alang niini aron dili na malangay ang pagkab-ot sa hustisya sa pamilya sa biktima.