Kabakakon nagpadayon

Kon maningil na ang samarang kinaiyahan human mapatuyangi’g dagmal sa mga linalang nga hakog sa gahom, salapi ug bahandi, makadaghan na gimatuod, nga wala gyoy sarang ikasagang ang tawo sa pagdahili sa mga nangaupawng kabukiran, sa makusog bul-og sa daw naghurementadong tubig nga miawas gikan sa kasapaan ug milunop-baha sa mga sakyanan, kabalayan, katindahanan ug unya mopalutaw pa sa mga naanod lawas sa tawo ug mananap, kinsa taliwala sa hilabihang pagpakigkombati nakabsan gyod sa ilang kinabuhi.

Kadaghan na kita makaagi’g bagyo – mga super typhoon. Diin, kanunayng masinati sa mga hingtungdang lumolupyo sa Pilipinas kining maong dagkong suliran nga angay hataga’g pulido-epektibong solusyon sa atong gobiyerno. Ang pangutana, unsa bay gibuhat sa administrasiyong Marcos?

Sa iyang ikatulong State of the Nation Address (SONA), si Presidente Bongbong Marcos Jr. (PBBM) mapagarbohong midiskurso, nga aduna kunoy 5,500 ka flood control projects (FCP) ang nahuman na ug may mga gipanghimo pa. Pero gibuking siya ni Bagyong Carina, kinsa mipabaha-lunop sa Metro Manila ug nagkadaiyang dapit sa Luzon, diin ang mga pamilyag naapektohan, nanuntong na lang sa ilang atop, nagpanawag og tabang dungan ang pagpaningil: “PBBM, hain na ba ang imong 5,500 FCP nga nahuman na?”

Nasayran, nga sa wala pa ipahigayon ang ikatulong SONA, mihatag nag report si Department of Public Works and Highways Secretray Manuel M. Bonoan ngadto ni PBBM. Siya mipahibalo bahin sa 5,500 FCP nga nahuman na kuno. Apan dihang giimbistigahan na kini sa Senado, si Bonoan mitug-an, nga wala kunoy flood control master plan nga gihimo ug wala poy budget nga nadawat ilang ahensiya para niining maong proyekto. Pastilan, makalibog! Unsa ba gyoy tinuod? Ug kinsa bay mitug-an sa tinuod?

Tinuoray gayod ang ginaingon, nga kon unsa ang punoan, mao usab ang iyang mga sanga, dahon ug nagkalainlaing bahin sa iyang pagkapunoan. Nga sa ato pa, kon ang punoan mangga, tanang kabahin niini, mangga usab. Dili gyod mahitabo nga mahimong mansanas.

Sa laktod, kon ang punoan, bakakon, mao usab ang tanang nahatipik kaniya. Ang pait, kon kini magpadayon. Unya walay tarong-honest, usa ka Santa nga kanila makasanta! Kay segurado, ilang ‘ligaya, tuloy,’ samtang kita, mga pobreng Pinoy, mosamot kamakaluluoy!

Unya, mangiyugpos ka ba lang gihapon, Bay?