Usa sa nidupa ni Bamban, Tarlac Mayor Alice Guo, dihang gidudahan ang iyang koneksiyon sa ilegal nga Philippine Offshore Gaming Operator (POGO) hub sa luyo sa munisipyo, paspas nga pagburot sa iyang katigayonan ug katinuod sa iyang Filipino citizenship, mao si kanhi Presidential Spokesperson Harry Roque.
Matud ni Roque gidaugdaog sa mga senador si Guo, dili krimen ang pagdako sa mga negosyo, dili sayon ang pag-angkon nga ang iyang inahan ang katabang nga gipa-angkan sa iyang amahan, ug makalibog unsay balaudnon nga mapasar human gi-utingkay ang pribadong kinabuhi ni Guo.
* * *
May nangagpas nga ang paglaban ni Guo kabahin sa iyang katabian: Pagkomentaryo sa mga kontrobersiya aron pagpahinumdom sa katawhan nga naa pa siya bisan wa nay puwesto sa gobyerno, labi nang nag-ung-ong ang eleksiyon sa 2025.
Duna say nagduda nga di lang siya ganahan ni Senador Risa Hontiveros, nga takos nga nangulo sa pagbisto sa tanang pamakak ni Guo, ug ang paglawgaw sa imbestigasyon makatabang sa wa pa mapawong niyang ambisyon nga mag-senador. Wa g'yuy nagtuo nga may labot diay sa mga personalidad nga gilambigit sa ilegal nga POGO.
* * *
Dihang nakit-an ang iyang ngan sa mga dokumento nga nasakmit sa ronda sa ilegal nga POGO sa Porac, Pampanga, nanagang nga abogado siya sa tag-iya sa yuta nga igo lang giabangan ug busa way labot sa ilegal nga operasyon.
Pero ang iyang kliyente nga si Cassandra Ong maoy tag-iya sa POGO, nagpakuyog niya sa Philippine Amusement and Gaming Corporation (PAGCOR) paghusay sa utang sa POGO, nisugo niya pagtawag sa PAGCOR ka-unom ka higayon pag-apura sa lisensiya sa POGO, libreng nipapuyo sa iyang assistant nga si AR dela Serna sud sa POGO compound, ug samang Guo nagtagu-tago ug gidudahang peke sang Filipino citizenship.
* * *
Nisamot kalawom ang gahong nga nahimutangan dihang ang balay sa Tuba, Benguet nga gironda kay gidudahang gitagoan sa mga tagdumala sa POGO sa Bamban, giangkon nga gipanag-iya sa kompaniya, nga gipanag-iya sa korporasyon nga duna siyay interes. Sa laktod siyay tag-iya.
Gibisto sang Hontiveros nga ang nadakpan sa balay ni Roque Chinese national nga wanted sa daghang dagkong krimen sa China. Sa laktod, mas lawom diay ang tuyo sa iyang panglawgaw.
* * *