PUV modernization gipamolitika na!

Mora'g gitakloban sa langit ang nagkadaiyang kooperatiba ug hugpong sa modernized public transport karon sa nasolud tungod sa dakong twist sa lagda nga gipatuman sa kagamhanan ang PUV Modernization Program nga abot sa kamot na unta nga hingpit makab-ot kay anaa naman sa 81% ang compliant niini ug 19% nalang ang nahabilin kay nagmagahi gihapon sa pagtuman sa programa sa kagamhanan.

Naunsa nga pagkaunsaa nga gidapigan man sa mga senador ang minority sa transportation sa ilang Senate resolution nga pagsuspenso una sa implementasyon sa consolidation ug walay detalye kon hangtud kanus-a basta hangtud lang maplantsa ang angayan nga mga han-ayon sa programa. Pagkapait gyud huna hunaon niadtong nakapa-consolidate ug misagop na gyud sa modernisasyon kay minilyon ang ilang utang ngadto sa mga bangko ug sa ingon niini ka sayon mawagtang ang tanan.

Nagkahiusa ang Federation of Cebu Public Transport sa pagpanuktok karon sa kasingkasing sa mga senador nga unta mahumok ug ikonsiderar usab ang ilang kahimtang kay dili lalim nga malubong sa utang ug ingon niini lang ang ilang dangatan. Gikatakda silang mopadala og suwat sa senado ug mismo sa presidente sa nasod.

Base sa kamandoan ni PBBM napupos na gyud unta ang consolidation niadto pang Abril 30 busa kompiyansa kaayo ang mga pabor sa modernization nga padayon na gyud sa pagdis-og ang programa. Ug sa dihang kalit lang dunay pagtuyok nga nahitabo ug nibalik sa uno ang tanan.

Unfair gyud kaayo kong tan-awon nato nga mapadaplin ang kinabag-an sa sektor, imagine 81% ang mabutang sa alanganin kay gihatagan og pabor ang 19%, asa ang hustisya niini, matud sa mga miyembro sa pederasyon nga mas maayo pa og wala sila moapil sa sinugdanan pa lang kay wala man diay klaro ang pagpatuman niini.

Usa nalang ang ang paglaum nila si Presidente Marcos kong dili pud lagi madala sa mga senador pero mora'g mopatigbabaw gyud ang pagpatuman niining modernization kay balaod naman gyud kini, gawas lang seguro kong amendahon sa balay balaoran ang balaod, mas mopatigbabaw gyud ang balaod kay sa resolution gikan sa senado.

Nganong nahitabo man ni karon nga naglabot labot ang mga senador? tataw na kaayo ang tubag pagpangandam sa umaabot 2025 elections kay gamiton nila kining isyuha pampahumot sa ilang ngalan. Kong mao ni ilang tumong wrong move gyud kay inay mahumot sila, mas manimahong tae ang ilang pagkatawo kay majority naman ang ilang kontra, gawas pa ang mga tawo pud nga nakasinati na sa modernong transportasyon nakauyon ug nakadawat na niini kay mas convenient man sakyan.