Teacher Athena, gipuy-ang pagkaedukada

Grabe ka sensitibo ang social media karon. Gamay lang kasikas nga namugna sa usa ka panghitabo, i-post dayon,  sama sa nahitabo niadtong usa ka transwoman nga wala dayon pasudla sa duroha ka guwardiya (babaye’g lalaki) ug sa ka kaubang policewoman, kinsa maoy nadestino sa Entrance-Exit gate sa Basilica Minore del Santo Niño, Cebu City, tungod lang kay walay ikapakitang identification card (ID).

Pastilan, mibaha gilayon ang nagkalainlaing batikos, batok sa maong mga otoridad.   

Apan base sa mga interview sa media ni Teacher Athena (ngalang makita sa iyang Tktok account), ania iyang asoy.

Ang iyang tuyo pag-adto sa Basilica Minore del Santo Niño mao lamang ang pagbisita, pagdagkot ug pagpalit og dakodakong imahe ni Senior Santo Nino aron iyang dad-on sa Taiwan ug iilis sa iyang napalit kaniadto nga gamay ra.

Apan tungod kay nag-short pant, wala siya pasudla. Hinunoa, mahimo ra siyang makasulod kon magsul-ob og tapis nga inandam sa simbahan, basta makapakitag ID. Ang problema kay wala siyay ID, passport ra! Pero, wala gyod modawat ang mga guwardiya.

Dinhi na misalga ang policewoman, kinsa nangutana unsay gender ni Athena? Unya dihang mitubag nga ‘Male’ dungan sa pagpakita-bukhad sa iyang passport, dali rang nakapamulong ang policewoman: “Aw, male man diay, puwede ra makasulod!”

Medyo nalain si Athena. Labi na may nakita siyang babayeng foreigner, nga nag-short og pakigol samtang siyang nagsul-ob og hapit kutob sa tuhod, gilisodlisod?  Ikaduha, naglibog siya nganong lalaking nag-short ra man ang mahimong pasudlon? Nganong dili na man lang sab iapil ang mga babaye?

Pero bisan pa sa maong kapalpakan sa naasoy'ng mga otoridad, wala gyod masuko si Athena. Hinunoa, iya pa silang gidayeg nga mga maayo kunong motuman-mopatuman sa balaod gikan sa ilang labaw. Hinungdan, nga miadto siya sa Basilica Security Office, diin iyang gisuginlan ang kinatas-ang opisyal sa kinatibuk-ang hitabo ug gihangyo nga unta usbon na nila ang nakit-an niyang sayop nga sistema.

Sa panapos pamahayag, nangayog pasaylo si Athena sa iyang sipyat – sa iyang pagsul-ob og short. Pero, in fairness, base sa gipakitang larawang gi-post, ang iyang gisul-ob, pormal baya.

Morag sayal kay luag man ug taas pa gyod. Sa bagay, teacher siya. Busa, very well-educated.