Hulga ang vape

Naghiusa ang Department of Health, Department of Trade and Industry ug nasudnong kapolisan sa pagpakugbatok sa VAPE o electronic cigarette tungod kay nasuta nga makadaut gihapon kini sa panglawas tungod sa presensiya sa nicotine niini.

Nasayran sa mga eksperto sa panglawas nga nagkadaghan ang mga minor de edad nga naggamit og vape, ang pinakabata nagtungha pa kini sa Grade 8.

Ang vape sa sinugdanan gihiming alternatibo alang niadtong kusog manigarilyo nga gusto na nga mohunong sa pagpanigarilyo sa pagtuo nga dili kini makadaut sa tawo. Apan sa kaulahian nga mga pagtuon nasuta nga anaa gihapon ang nicotine niini.

Tungod sa nagkadaghan nga minor de edad nga nag vape, ang tulo ka departamento sa gobiyerno naghiusa sa pagpakgang niini.

Kun tumong man sa gobiyerno ang pagpanalipod sa mga minor de edad sa makadaut nga vape nganong tugotan pa man kini nga matang sa negosyo? Nganong dili naman lang putlon o i-ban kining maong negosyo? Buhis ba gihapon ug trabaho ang hinungdan?

Ikompromiso ba gihapon sa gobiyerno ang panglawas ss iyang katawhan tungod lang sa panginahanglan niining salapi ug trabaho nga mahatag sa nahisgotan nga negosyo?

Unsa man gyod diay ang palabihon sa gobiyerno, unsa man diay ang mas bugat pa niini, ang panglawas o ang salapi ug trabaho.

Gikompromiso na sa gobiyerno ang panglawas sa katawhan tingod sa wala pagwagtang o pagpahunong sa operasyon sa sigarilyo ug mga ilimnon nga makahubog tungod sa rason nga binilyon nga salapi ang mawagtang sa gobiyerno gikan sa buhis sa mga naghimo og sigarilyo ug daghan nga trabahante ang makulban sa ilang kaldero. Mao ba gihapon kini nga rason ang ihatag sa gobyerno sa dili pagpahunong sa operasyon sa mga naghimo og vape?

Kun mao man lang gani gihapon, kanusa kaha matisok sa alimpatakan sa mga nagdumala sa gobiyerno ang pagkamahinungdananon sa panglawas kay sa salapi ug trabaho?