TOPS gipatawag na sa OSCA

Mipasaka na ko og reklamo didto sa Office of Senior Citizens Affairs (OSCA) batok sa mga tagdumala sa TOPS nga mibaliwala sa ordinansa sa Cebu City nga dili pabayron og parking fee ang mga senior citizen.

Gilatid sa ordinansa sa Cebu City nga bisan kon dili senior citizen ang nag-drive sa sakyanan, apan dunay senior citizen nga sakay sa sakyanan nga iyang gimaneho, apil kini nga dili pabayron og parking fee.

Si Atty. Homer Cabaral, hepe sa OSCA, mipadala na og invitation letter ngadto sa management sa TOPS, ilabi na ang entrance fee collector niini nga si Jessa Patalinghug aron moatubang sa husay sa akong reklamo karong Agosto 7 sa buntag.

Usbon nako pagpasabot nga ang mga senior citizens pabayron gyud og entrance fee kon mosulod diha sa TOPS, kay gigastohan gud na nila og minilyon ka pesos.

Apan ang kabahin sa parking fee nga P50, nakasupak na sila sa balaod kon ipamugos gyud nila nga mangolekta sila gikan sa mga senior citizen nga nag-drive og sakyanan, ug bisan na ug ang senior citizen pasahero lang.

Usa ka staff sa OSCA mimatuod gyud nga nangolekta ang TOPS og parking fee sa mga senior citizens kay siya mismo, nga usa ka retired police, gipabayad dihang miadto siya sa TOPS.

Kining akong gihimo, paglaban kini sa katungod sa mga senior citizens kay duna may balaod, busa atong tumanon. Matud pa bitaw, “Nobody is above the law.”

Duna sa’y usa ka ospital dinhi sa siyudad, gireklamo sab kay mao gihapon, pabayron nila ang mga senior citizen nga mo-park sa ilang sakyanan bisan kini og pasyente. Aw, gamay ra man hinoon ang multa niini, P1,500 ra sa first offense. Insulto kaayo ni kang Cebu City Councilor Rey Gealon nga ang iyang gigama nga ordinansa nga di na gyud pabayron og parking fee ang mga senior citizens, giyam-iran lang sa TOPS.

* * *

Deboto ko ni Senyor Santo Niño ug makapamatuod ko nga milagroso kini. Apan tambagan nako ang publiko nga ayaw dayon mo pagtuo kon dunay tabitabi nga usa ka imahen nagmilagro.

Duna man gu’y report nga mihilak  kuno ang usa ka mata sa imahen ni Santo Niño sa usa ka panimalay diha sa Sitio Tayud, Barangay Basak Pardo, Cebu City kaniadtong Biyernes, July 26, 2024.

Wa ko moingon nga namakak sila, apan tambag lang nga ayaw dayon mo’g too nga dili pa mahimoan og pakisusi ang maong pangangkon nga mihilak ang imahen.

Basin mapareho na didto sa Villa Bulsita sa Barangay Bulacao kaniadto nga usa ka imahen sa Santo Niño may nagtubod sab nga tubig sa iyang mata.