Suwat ni Sara
Nabantang sa suwat ni Bise Presidente Sara Duterte Carpio ngadto ni Police General Rommel Marbil, hepe sa Philippine National Police (PNP), ang duha ka sekreto:
Wa tudloi sa iyang mga ginikanan, maong wa motuo sa leksiyon sa eskuylahan, sa unom ka bahin sa pormal nga suwat (address sa nagpadala ug petsa sa pagsuwat, ngan ug address sa gipadad-an, pormal nga pagtimbaya, unod, matinahurong pagtak-op, ug ngan ug pirma sa nagpadala); ug
Pagtudlo sa iyang kaugalingon nga designated survivor nagkahulogan nga giisip niyang State of the Nation Address (SONA) nga katalagman.
* * *
Naklaro nga ang suwat nahimo human sa iyang pagbiya sa gibahaan nga Metro Manila niadtong Miyerkules. Kay naapil man sa iyang reklamo ang pagpagawas sa footage sa CCTV nga nagpakita niya ug sa mga sakop sa iyang pamilya sud sa Ninoy Aquino International Airport (NAIA).
Sa iyang pangasaba ni Marbil, nisingit ang bise presidente og pamawi sa iyang pagpalabi sa bakasyon kay sa pag-unong sa mga biktima sa katalagman. Nisugyot nga imbes maglalis sila, mas maayong unahon pag-atiman ang mga biktima sa baha ug pagpahasubo sa mga namatyan.
* * *
Nipasangil ang bise presidente nga may mga polis nga namugos pagtultol sa balay nga iyang giabangan ug gipuy-an sa iyang mga anak. Ambot tinuod ba. Pero mas sayon nga mahibaw-an ni Marbil asa siya nagpuyo gikan sa 120 ka sakop sa Vice Presidential Protection Division (VPPD).
Nabalaka nga kon naapiki ang iyang seguridad, unsa kahay panghasi sa kapolisan batok sa ordinaryong mga molupyo. Pero gihimong sampol si Apollo Quiboloy nga angay lang dakpon tungod sa mga kasong kriminal.
* * *
Pero silang Carpio ug Marbil pulos nagtuyuk-tuyok sa tinuod:
Namakak si Marbil sa palusot nga gikuha ang mga guwardiya ni Carpio aron pagdugang sa visibility sa kapolisan sa National Capital Region kay ang tinuod nga rason mao nga gituman lang niya ang sugo sa politikanhong liderato pag-apiki sa mga Duterte; ug
Nagpa-gorya-gorya si Carpio sa suwat kay siyay labing nahibawo nga si Marbil way laing mahimo gawas sa pagyangu-yango bisan unsay sugo sa iyang superbisor nga si Interior ug Local Government Secretary Benhur Abalos ug sa iyang commander-in-chief nga si Presidente Ferdinand Marcos Jr.
* * *
- Latest
