Bata gihimong sex slave sulod sa ilang balay naluwas

Usa ka menor de edad ang nabiktima sa pag-among-among sa iyang ama-ama or stepfather sa dakbayan sa Talisay ang naluwas sa mga operatiba sa National Bureau of Investigation kon NBI CEVRO sulod mismo sa balay sa biktima nga misangpot usab sa pagkasikop sa suspetsado kinsa nagtingkagol na karon sa detention facility sa NBI.

Napasakaan siya og kasong statutory rape nga walay girekomendar nga pyansa ug nagtangag og bug-at nga silot ngqa mao ang tibuok kinabuhi nga pagkabilanggo kong mapamatud-an nga sad-an.

Sa pagkasikop sa suspek ug sa pagkaluwas sa biktima, nahatagan na kini og partial justice, partial kay wala pa man gyud nakasugod gani og ligid ang kaso apan kompyansa ang NBI ug ang DSWD nga lig-on ang ilang kaso nga seguradong makakuha og conviction tungod sa mga bug-at nga ebidensya nga ilang gihuptan.

Balikan nako ang panghitabo nganong niabot ang kinutoban sa yawan-on nga binuhatan sa iyang ama ama. Kini tungod sa pagpakabana sa usa concernced citizen nga nakabalo sa panghitabo. Sumala pa nga mitug-an kining biktima ngadto sa iyang best friend ug sa wala tuyoa nakapaminaw ang amahan sa best friend. Ug dihang iyang nasayran ang pait nga kasinatian niini, iya kining gisukitsukit ug nitug-an sa tanan ang bata ug sa walay paglangan nitaho dayon sa NBI ang concerned citizen ug giplano ang rescue operation.

Pag-abot sa mga operatiba sa NBI nalipay gyud kuno ang bata nga sa katapusan maluwas na siya sa impiyerno nga iyang giantos. Misugid siya sa tanan nga panghitabo kaniya nga gisugdan siya og hilabot sa iyang stepdad otso anyos pa lang siya hangtud na sa nag edad siya og hapit 14-anyos.

Dihang gipangutana siya kanus-a ang kataposang paghilabot kaniya, nianang gabhionan sa wala pa siya i-rescue sa mga otoridad. Dili na maihap kuno ang higayon nga siya giamong-amongan sulod mismo sa ilang balay. Mahitabo kini sa tungang gabii ug sa kaadlawon kong diin tulog na ang tanan. Dili siya makareklamo kay gihadlok siya sa suspek.

Karon nga anaa na siya sa unang hunat sa pagkab-ot og hustisya, mora’g wala man siyay kakampi sa iyang pamilya kay matud sa NBI nga ang inahan mismo niini nagduda man sa pamahayag sa iyang anak ug didto modapig sa suspek kinsa amahan usab sa tulo niini ka mga anak.

Unsa man adunay kasayoran ang inahan sa nahitabo sa iyang anak ug nagpakabuta bungol lang siya kay mas gipalabi ang iyang bana? Kong tinuod kini pagkatampalasan ra usab inahana nga mao man untay unang manalipod sa iyang anak ilabi na niining panahona.

Mas maayo pa ang laing tawo kay maoy naningkamot nga maluwas gikan sa impierno ang biktima. Dinhi nato makita nga kong magpakabana lang ang tawo aduna gyuy mahimo, makaluwas gyud og kinabuhi ilabi na niadtong mga biktima nga huyang pa kaayo sama niining bata nga gihimong sex slave sa iyang ama-ama sulod sa ilang balay nga mao untay labing luwas nga dapit.

Nag inusara man karon ang batang biktima apan adunay lig-on siyang gisandigan nga mao ang hustisya pinaagi sa abag sa mga ahensiya nga nagtan-aw sa iyang kahimtang ug sa mga tawo nga nagtan-aw sa iyang kaayohan bisan og talikdan siya sa mga tawo nga unta iyang gisandigan.