Siloti gyud uy

Nailhan na kuno sa kadagkoan sa kapolisan kadtong mga polis nga nagmaskara ug misu’d og panimalay, dayon nanion og armas sa mga nagpuyo didto sa usa ka dapit sa Dauis, Bohol niadtong Sabado.

Matud ni Police Lieutenant Colonel Gerard Ace Pelare, ang spokesman sa Police Regional Office (PRO)-7 nga imbestigahon nila ang maong reklamo sa mga tag-iya sa balay nga gisu’d sa mga polis.

Angay lang gyud nga imbestigahon ug silotan ang maong mga polis, kay sa pasiuna nakong tan-aw, klaro kaayo nga nakalapas sila sa balaod. Una, wa sila’y search warrant aron sudlon ang balay, ug wa sab sila’g gigukod nga dakponon nga midagan ug didto mitago.

Ang tinuod Colonel Pelare, daghan kining mga matanga sa polis nga manulod og balay nga magmaskara. Nganong magmaskara man gyud sila?

Diri mismo sa among lugar, dunay balay sa among silingan gironda og mga tawo nga nagmaskara, ug mga nindot kaayo’g armas. Nalipay ko kay ang mga tawo nga gusto nilang dakpon namaligya man kuno og drugas.

Apan milabay na lang ang mga adlaw, wa gyuy balita nga dunay nadakpan nga mga drug pushers ug drug users nga taga diri sa among lugar. Nakakita ko nga may dinakpan, ug dunay mga shabu. Gipangwarta ra ba to?

Mga usa ka buwan na ang milabay, ang magtiayon nga Jimmy ug Brenda Tumarao sa Barangay Bacayan, gisu’d og mga armadong tawo nga nagpatuo nga mga polis.

Gidakop ang ilang anak kay gidudahang nalambigit sa ilegal nga drugas, apan gibuhian ra sab human nila gi-raid ang balay, gipang-utingkay ang kabtangan, unya kay wa may nakitang shabu, namiya.

Tarong ba gud na? Kadtong gihimo sa upat ka armado didto sa mga nagpuyo sa usa ka balay sa barangay sa Dauis, Bohol, lain kadto nga kabuang sa kapolisan.

Klarohon nako ngadto sa mga polis, kauban ta sa kampanya batok sa ilegal nga drugas. Apan ayaw tawon mo pag-abuso nga sudlon ra ninyo ang kabalayan ug pangtionan og armas ang mga tagbalay.

Ibutang kuno nga kamo ang anaa sa ilang dapit, unsa kaha ang inyong bation? Dili kaha magkagot ang inyong mga ngipon sa kapungot sa maghimo niini?

Malipay gyud ko kon ang tagbalay nga inyong sudlon, dunay armas ug mapusilan mo kay magtoo sila nga mga daotan mong tawo nga ang katuyoan mao ang pagpangidnap.

Alang sa kadagkoan sa kapolisan, sa PDEA ug ubang law enforcement units sa kagamhanan, palihug, undanga na ninyo kining maong binuang kay imbes ang mga tawo motahod ninyo, kawad-an sila’g respito sa mga tigpatuman sa balaod.

Kon pananglit buy-bust, unya ang subject nga dakponon modagan ug mosu’d sa ilang balay, diha pa nga kamo pwedeng mosu’d nga way search warrant!