Undangon ang political dynasty

Mipasaka’g balaodnon si Senador Robin Padilla kansang katuyoan mao ang katumanan sa gimando sa Konstitusyon sa pagdili sa mga political dynasty sa nasud.  Alang sa senador, panahon na nga lumpagon ang babag nga nakasanta sa mga labing angayan sa pagpangalagad ug pagdumala sa nasud. Sa usa ka demokrasya nga sistema, dakong sayop ang political dynasty apan dili kini masanta kon walay balaod batok niini.  Ginaingon bitaw nga “Ang politiko ug ang diaper kinahanglan nga ilisan kanunay ug sa managsama nga hinungdan.”  Madahaaan!              

Mapulihan ra gihapon

Samtang nangandam na ang DepEd sa paglingkod unya sa bag-ong kalihim nga si Senador Sonny Angara, gikataho usab nga adunay pipila ka opisyal sa ahensya ang mi-resign sa ilang katungdanan.  Wala pa hinuon masuta kon unsa ang rason sa ilang pag-resign. Hayan mga tinudlo kini sila sa kanhi kalihim nga si Bise Presidente Sara Duterte ug nasayod na tingale sila nga mapulihan ra gihapon sila sa ilang pwesto.  Sama sa barko nga nagbiyahe sa laing nasud, kon bag-o ang kapitan, bag-o usab og mga tripulante.  Matud pa bitaw sa panultihon nga tinagalog, “Bagong hari, bagong ugali”.  Muleeng!

Peke nga ‘CSR’

Nagkadaghan na ang mga senior government officials ug mga civil society organizations ang nasagmuyo sa legal opinion nga giluwatan sa Department of Justice nga nagpadayag nga mahimo ra’ng modawat ang DSWD og donasyon gikan sa mga tigbuhat og sigarilyo. Alang kanila, peke ang maong pagpakita sa Corporate Social Responsibility (CSR) ug gihimo lang kini aron makakuha sila’g pabor kon adunay mga polisiya sa industriya sa tabako nga pagaumolon sa kagamhanan.  Matud pa sa akong amigo, “Mora’g minaut man ang pagsaway nga peke’ng CSR ang donasyon sa mga tobacco industry.  Modawat man gani og donasyon ang simbahan bisan gikan sa mga pasugalan.” Fezteleern!

Nalupig sa hinambogay

Giyam-iran ni PCG Commodore Jay Tarriela ang pagpanaway sa Ministry of Foreign Affairs sa China sa mga “bullies” pinaagi sa pag-ingon nga “Walay nasud nga labaw sa uban.  Walay bisan kinsa nga adunay katungod pagdaug-daug sa uban.”  Tataw nga propaganda lang ang maong pamahayag sa China kay kon buot hunahunaon, sila man ang maunay niini. Tabunok ang panghunahuna sa China sa natad sa lipat-lipat.  Dayag usab ang atong kakulangon sa natad sa psychological warfare.  Baniog man unta ang kapagarpar sa Pinoy apan ni’ng higayona, sa hinambogay gilupig gyud ta.  Fishkots!

“Crab mentality”

Adunay pito ka bag-ong record nga na-establisar unta sa track event sa athletics competion sa bag-o lang natapos nga 64th Palarong Pambansa ang dili paga-ilhon sa mga organizers human masuta nga kulang sa sukod ang oval sa Cebu City Sports Center.  Tungod sa kapalpakan sa mga hingtungdan, ang mga kabataan’g atleta hinoon ang daw nasilotan.  Inay pangitaan og solusyon agi og pagrespeto sa kahago sa kabataang atleta, daw naglumba na man hinoon og pasiatab ang mga kadagkoan sa DepEd sa pag-anunsyo sa maong kapakyasan.  Bisan sa natad sa paugnat sa kusog, anaa gihapon ang “crab mentality”.  Pagkatoytoy!