Kahigayonan sa pagpangilad

Puwera sa mga maayo og gawi nga mga taxi drivers, aduna gyud gihapon nga mga driver sa taxi nga mangingilad kinsa mopahimulos sa kahigayonan ug manigbas sa ilang mga pasahero ilabi na niining panahon sa Palarong Pambansa nga ilang gipang igo intawon pinaagi sa pagpaburot sa ilang pletihan.

Sama nalang niining pipila mga driver sa taxi nga nadakpan gyud sa mga otoridad nga mihimo sa kalapasan nga wala mogamit sa ilang taxi meter inay nangontrata ug nagpasobra sa kadako sa ilang gipangayo nga pleti. Sama nalang niadtong usa kanila nga nangayo og tres mil pesos nga plete sa pasahero nga nag gikan sa dakbayan sa Sugbo padung sa dakbayan sa Carcar. Sagad ra ba sa ilang gipamiktima ang mga delegado sa national games nga limitado ra usab ang budget busa luoy pud intawon kaayo nga ila pa gyud gidaginot. Wala uroy makonsensiya sa ilang gihimo nga panulis na sa atubangan kay ang pagpangayo og dakong kwarta nga supak sa kabubot-on sa usa ka tawo, pagpanulis na kana.

Abi man nako og sa Manila ra mahitabo apan duna na usab kini dinhi sa Sugbo nga naghatag og dautang imahen sa dapit kay ipanabi naman sa mga dumuduong ang ilang dautan nga kasinatian nga gikawatan sila sa ilang atubangan sa mga taxi drivers nga walay batasan.

Walay dautan nga binuhatan nga walay balos, ang uban ra ba instant karma ang mahiaguman maong sila ang madakpan ug magpaluoy dayon kay lagi dunay pamilya nga gipakaon. Baga gyud og nawong nga ipakaon sa ilang pamilya ang kwarta nga silang nakuha sa pagpangilad.

Dili nalang ta matingala nga dunay mga nag-viral nga mga nanginabuhi sa transport sector nga nangilkil na sa ilang mga pasahero nga mga langyaw nga turista, biktimahon man gani ang mga samang Pinoy, mga langyaw pa kaha. Lahi na baya ang panahon karon kay ang mga dautang binuhatan dali rang masakpan tungod sa teknolohiya nga makuhaan og video ug kuninitan dayon sa mga tawo. Kining ingon niini suliran dugay na kay lagi ang mga naghimo og tinunto dili man mapahamtangan og bug-at nga silot labi na kong humok og kasing kasing ang mga pasahero nga dili na motinood sa ilang reklamo aw lusot gyud ang mga walay puangod nga mga drivers sa taxi.

Dili lang gani mga taxi drivers kon dili labaw na mopaak sa mga customers ang mga habal habal driver nga mangigo gyud ug bulgaran ang ilang mga tinonto bisan og nakabalo nga gi videohan sila sa mga tawo, magsalig gihapon nga gaan ra man ang silot kon adunay moreklamo. Hangtud kanus-a man kaha kini mawagtang kong aduna pay paglaum nga mawagtang pero hangtud nga walay bug-at ibalewala kini nga problema sa atong katilingban  dili gyud kini masumpo kay mao naman kini ang ilang nabatasan.

Ako modayeg ko sa mga amigo natong mga taxi drivers nga nagtinarong sa ilang serbisyo nga bisan og ginagmay lang ang kita apan taas kaayo ang ilang agtang nga moingon nga nagtinarong sila sa pagpanginabuhi alang sa ilang pamilya, apan kining mga badlongon nga miembro nila angayan nga kondenahon ug silotan aron dili na makapamiktima sa ilang isig ka tawo.