Ning semanaha, tulo ka mga drayber sa taksi ang nasakpang nag-overcharging sa singil sa pletihan ngadto sa ilang mga pasahero.
Ang duha nasakpan mismo sa mga ahente sa Land Transportation Office-7 ug ang labing uwahi, mga sakop sab sa Highway Patrol Group-7 maoy nakasakop.
Ang reklamo naabot sa buhatan sa LTO-7 ug Cebu City acting mayor Raymund Alvin Garcia kinsa mipadayag nga seryuso kini nga pitolon kining mga abusadong drayber kay kini makadaut sa imahe sa siyudad.
Sa miaging adlaw, ang HPG-7 milusad sab og ilang operasyon, tuod man, wala gyud masipyat kay ang ilang operatiba nga nagpakaaron-ingnong delegado sa Palaro nisakay gikan sa Pier Uno ug nagpahatud sa Cebu City Sports Center gipangayoan og P200 nga unta kun gigamitan og metrohan P75 ra.
Sa pagkatinuod, uwahi ra kaayo ang gihimo sa LTO-7 ug sa HPG-7 pag-aksyon batok aning mga mapahimuslanong mga taxi drivers dinhi sa Metro Cebu. Dugay na kini nga binuang apan hasulan lang ang mga pasahero sa pagsumbong. Kada adlaw mao na kini ang binuhatan sa pipila ka mga drayber sa taksi ilabi na sayo sa buntag, kanang mga mag-atang sa pagdunggo sa mga barko diha sa pier area ug sa mga terminal.
Ang mga pasaherong bag-o pang nakanaog dili dayun makasakay og taksi kay halos tanang drayber ‘pakyaw’ ang ilang gusto aron mas dako og masingil. Sa laktod, pangilad kini ug kalapasan sa ilang prangkisa.
Di ikahibulong nganong apil sa mga nakasuwat sa mga travel tip guides (gikan sa travel agencies sa ubang nasud) para sa ilang mga kababayang gustong mosuroy dinhi sa nasud nga “magmatngon batok sa mga taksi nga dili mogamit sa metrohan.”
Hagit kini ngadto sa mga hingtungdang ahensiya kun padayonon nila ang pagpanakop bisag nahuman na ang Palaro. Kada adlaw baya daghang bisita ang Sugbu gikan sa ubang mga lugar.