Pabaya

Napalgan na nga patay ang unom sa pito ka mga nawagtang tungod sa pagkaanod sa baha nga nahitabo sa lungsod sa Carmen, lalawigan sa Sugbo pasado alas 5:00 sa hapon niadtong adlaw nga Lunes.

Sa pagsuwat ning maong lindog, padayon pa nga gipangita sa mga sakop sa Municipal Disaster Risk Reduction Management Office sa lungsod sa Carmen, mga sakop sa Philippine Coast Guard, Philippine Army ug mga volunteers ang nahabiling usa nga wala pa g'yud makit-i.

Ang mga namatay ug wala pa makit-i apil sa 17 ka mga pasahero nga sakay sa usa ka pickup nga sakyanan nga misungasong gayod sa pagtabok sa dalan bisan sa kakusog na sa bul-og sa tubig nga mibaha sa Sitio Mangit-ngit, Barangay Proper sa lungsod sa Carmen. Gikan sila sa Middle Earth Resort.

Sigun sa asoy sa mga nakasaksi sa hitabo nga gibuyag o gibadlong sa mga nagtambay sa lugar ang nagmaneho sa sakyanan sa dili pagtabok tungod sa kakusog na sa bul-og ug ka lawom na sa tubig apan gisungasong gayod kin isa nagmaniho sa sakyanan kinsa mao usab ang tag-iya niini.

Dili lang ang Sugbo ang nakasinati og mga pagbaha. Sa nasud nga Nepal miabot sa 47 ka mga tawo ang namatay tungod sa baha. Sa Texas sa Amerika aduna usab 14 ka mga tawo ang namatay tungod gihapon sa baha. Gibaha usab ang nasud nga China. Apan ang mga namatay sa baha sa mga dapit gawas sa nasud, namatay gayud tungod sa baha dili pariha sa nahitabo sa lungsod sa Carmen nga ang mga namatay, namatay tungod sa pagpabaya ug hinambog.

Giingon nga 2024 model ang pickup nga gimaneho sa tag-iya niini nga usa ka seaman. Tungod seguro kay bago ang sakyanan, nagtuo ang nagmaneho niini nga makasungasong gayod kini sa kusog nga bul-og sa tubig o ba kaha nagtuo siya nga amphibian ang sakyanan nga iyang gimaneho.