Kontrabida sa BRT
Usa sa mga saad sa mga opisyal sa Cebu City nga sa di pa magsugod ang Palarong Pambansa 2024, nga apilan sa 12,000 ka atleta gikan sa tanang 17 ka rehiyon sa Pilipinas, makasugod na ang operasyon sa labing una nga bus rapid transit (BRT) sa nasud.
Ablihan na ni Presidente Ferdinand Marcos Jr. ang Palaro karong hapon, wa pay bisan gamay na lang nga timaan kanus-a makasugod ang BRT. Ambot duna na bay tagduma sa proyekto nga nangayo og pasaylo sa wa pagkatuman sa daghan na nilang pasalig.
* * *
Una nilang pasalig sa presidente atol sa groundbreaking sa proyekto sa Pebrero sa niaging tuig mao nga ang Cebu BRT maoy magsilbi nga pinaskohan sa 2023 sa iyang administrasyon ngadto sa mga Sugboanon.
Sunod nilang pasalig mao nga makadagan na ang BRT sa Hunyo ning tuiga. Nga maoy gibasehan sa pasigarbo nga mga atleta sa Palaro apil sa labing unang makasuway sa buses nga mas paspas nga mohatod nila sa mga mga ruta nga maagian sa unang bahin sa proyekto gikan sa South Bus Terminal hangtod sa Kapitolyo.
* * *
Ang Kapitolyo wa makigsawo sa kadasig sa proyekto. Si Gobernador Gwen Garcia, nga usa sa nipakpak sa saad ni Marcos sa niaging tuig nga humanon sa labing dali nga panahon sa mass transport system para sa mga Sugbuanon, nibakwi sa iyang suporta ug nangisog sa pagbaraw sa trabaho.
Mao nga magsugod ang mga duwa sa Palaro karong adlawa nga ang mabantang sa mga bisita mao ra ang pagkabalda sa trapiko sa mga istruktura sa wa pa mahitsura nga proyekto.
* * *
Hilom ang Department of Transportation, ang nagpatuman sa Cebu BRT, kanus-a makapadayon ang trabaho sa Phase 1. Bisan ang presidente, nga segurong napahibawo na kinsay kontrabida sa proyekto, di mangahas pag-apura kay gipalabi ang pamolitika sa kapin sa tulo ka milyon ka rehisradong mga botante sa Sugbo.
Maong nahibawo na ta kinsay dugang mga opisyal nga nisabotahe sa Cebu BRT (2014 pang naaprobahan ug nagsige na ta og bayad sa multa sa kalangay sa paggamit sa utang gikan sa World Bank ug France). Nag-una sa listahan silang kanhi Presidente Rodrigo Duterte ug kanhi Presidential Assistant Mike Dino.
* * *
- Latest
