Gipanghambog ni Presidente Ferdinand Romualdez Marcos Jr. ngadto sa tag-as nga opisyal sa Cebu Pacific nga mibisita kaniya nga misaka na ang ekonomiya sa nasud.
Gihimo ang pagpanghambog sa Presidente human siya pahibaw-a sa kadagkoan sa Cebu Pacific nga mopalit kini og usa ka gatos ka mga eroplano nga mokantidad og 28 bilyones ka dolyar.
Kun tinuod man nga misaka ang ekonomiya sa nasud, ang pangutana nabatyagan ba kini sa mga ordinaryong tawo? Ang misaka nga ekonomiya nakapabusog ba kini sa mga nagkutoy nga tiyan?
Sa akong naobserbahan ang gobiyerno mopamatuod sa ipanghambog nilang pagsaka sa ekonomiya pinaagi sa mga datus nga numero, pero sa tinamban nato nga pagsabot, makabusog ba ang numero?
Basi gihapon sa akong naobserbahan ang nakapahimulos sa unsa man nga pagsaka sa ekonomiya mao lang ang mga adunahan ug mga tag-iya og kompanya, mao ni nga sila ra pod ang kasagaran nga mouyon sa unsa man nga pagsaka sa ekonomiya.
Sa mga ordinaryong tawo, dili ang ekonomiya ang misaka kun dili ang presyo sa mga nag-unang palaliton, ingon man presyo sa mga produktong petrolyo.
Ang pagkatinuod sa pagsaka sa ekonomiya sa nasud kinahanglan nga pamatud-an kini sa gobiyerno dili pinaagi sa mga numero sa ilang datus kun dili pinaagi sa pagka busog sa tiyan sa mga tawo.
* * *
Nailad ang ginikanan ug apohan sa 4-anyos nga bata nga namatay tungod sa pagkaugbok sa iyang ulo human matagak sa sapa-sapa sa Barangay Inayawan.
Nakuha sa mangingilad ang limos nga hinabang para sa namatyan nga nagkantidad og P16,000.
Ngano kaha nga adunay mga tawo nga dili mahadlok og gaba?