Namakak si Sara?

Supak diay si kanhi presidente Duterte nga ang iyang anak nga si Vice President Sara Duterte molansar pagka presidente unya sa 2028.

Ambot og tinud-anay ba gyud kaha nga si Digong dili gustong molansar pagka presidente si Inday Sara, kay usahay ra ba dili sab kini siya katuohan.

Giingnan niya si Inday Sara nga ihatag na lang ang higayon ngadto sa usa ka tawo nga ambisyoso ang paglansar sa labing taas nga katungdanan sa nasud.

Bisan og wa isulti ni Digong kon kinsa ang iyang gipasabot, apan klaro kaayo nga ang gipasabot niya mao si House Speaker Martin Romualdez.

Maisip na nga “open secret” nga si Romualdez nagtinguha nga molansar pagka presidente sa nasud human sa termino sa iyang ig-agaw nga mao si Presidente Bongbong Marcos.

Gani, usa kini sa gitan-aw nga maoy nakaingon nga masiak ang panagsuod nila ni Bongbong, kay matud pa sa uban, “blood is sticker than water.”

Matud ni Digong nga pananglit og si Inday Sara dili maminaw sa iyang tambag, unya molansar ni pagka presidente ug makadaog, wa gihapo’y kasiguroan nga molambo ang nasud.

Bitaw, para kanako molambo lang ang nasud kon ang mga tawo nga magdumala sa kagamhanan mohiklin sa ilang kahakog sa kwarta.

Bilib ko ni Digong kay nahimo na siyang presidente apan nagpuyo ra gihapon siya sa dili kaayo nindot nga balay, ug mokaon lang gihapon og monggos ug buwad.

Apan wa malilong kanato nga dunay iyang mga sinaligan sa kagamhanan nga maoy giingong nangwarta atol sa iyang administrasyon, ug gani nag-atubang kini karon og kaso.

Unsay gihimo ni Digong kaniadto? Iya kining gilabanan, imbes unta nga iyang ipaimbestigar, ug kon may lig-ong nga basehanan nga nangurakot sila sa kwarta sa kagamhanan, iyang ipabilanggo.

Sa ingon nga paagi, mokurog ang ubang opisyal sa kagamhanan kay makita man nila nga ang presidente matinud-anon sa kampanya batok sa kurapsyon.

Balikan nato ang gibutyag ni Inday Sara nga si Digong ug ang duha ka anak ni Duterte nga mayor ug kongresista karon sa Davao, molansar kuno pagka senador.

Matud ni Digong ayaw gyud mo pagtoo ni Inday Sara, kay usahay isu’d mo sa bulsa. Sa ato pa, dili tinuod nga modagan pagka senador sila si Mayor Baste ug si Kongresista Paolo.

Balik ta kang Inday Sara. Kon magpapili man siya pagka presidente sa nasud, unya dili siya makahatag og tukma nga kwentada giunsa niya paggasto kadtong P120 milyones nga intelligenge ug confidential funds nga gipiyal kaniya, usa ni sa makahatag niya’g problema.