Dali patuohon ang naglibog

Gitun-an sa Philippine National Police kon aduna ba’y tulobagon si kanhi Presidente Duterte sa kaso’ng obstruction of justice tungod sa iyang pamahayag nga nasayod siya sa nahimutangan ni Pastor Apollo Quiboloy apan usa kini ka sekreto.    Daw pagarpar ra man kining pamahayag sa PNP.  Dili man gani manginlabot ug motugot si Presidente Marcos nga mo-imbestigar ang ICC sa kanhi pangulo.  Haum sa PNP ang panultihon nga, “Ang nagdumala sa mga dagkong institusyon usahay maayo magpatuo.  Ug kon ang katawhan naglibog na sa panghitabo, dali ra usab sila patuohon.” Madahaan!

“Hello horse”

Gipanghimakak sa mga Pilipino’ng mananagat nga na-angol sa pag-ulbo sa makina sa ilang sakyanan didto sa Panatag Shoal nga giluwas sila sa China Coast Guard.  Apan segun sa tigpamaba sa Philippine Coast Guard nga si Rear Admiral Armand Balilo, mitanyag kuno Chinese Coast Guard og tabang ngadto sa mga naangol nga tripulante.    Mora’g labaw’ng katoohan ang pamahayag sa mga mananagat.  Makapahinumdum sa radio reporter nga mitaho didto sa anchor sa estasyonan nga mahimo niyang interview-hon ang tinubdan sa balita aron maingon gayod nga “direct from the horse’s mouth” ang pamahayag.  Busa, gisugdan dayon sa anchor ang pag-interview pinaagi sa pag-ingon nga, “Hello horse, maayong buntag.” Pagkatoytoy!  

Hilaw ang pagka-umol

Gitahasan ni Presidente Marcos, Jr., ang bag-ong natudlo nga kalihim sa Department of Education nga si Senador Sonny Angara nga hatagan niini og pagtagad ang pagpalambo sa atong performance sa Programme for International Student Assessment (PISA) ingon man ang pagtudlo sa history.  Dili lang tingale bahin sa PISA ug history ang angayan palambon kon dili ang tibuok curriculum sa edukasyon kon buot nato nga mahimong competitive ang atong kabataan.  Kon mahilaw ang nilung-ag tungod kay kulang sa kalayo, mahimo’ng hilaw usab ang pag-umol sa hunahuna sa atong mga kabataan kon kulang kita sa mga inisyatibo.  Muleeeng!

Ipaubos sa euthanasia

Giangkon ni Dr. Alice Utlang, ang veterinarian sa dakbayan sa Sugbo, nga giimplentar gihapon sa DVMF ang euthanasia o mercy killing didto sa Cebu City pound isip katapusang nga kapa-ingnan sa mga iro nga gitugyan na sa DVMF sa ilang mga tag-iya labi na kon kini luya ug masakiton na. Sa kadaghan nga nasagmuyo sa matang sa serbisyo sa taga-gobiyerno ngadto sa katawhan, dako ang posibilidad nga adunay katawhan nga nangandoy nga pahamtangan ug ipaubos usab sa euthanasia ang ubang kawani ug mga opisyal sa gobyerno.  Basin na lang mo-alibyo ang pagpanglagad.  Tagaam!

Kuot sa kuoton

Giawhag ni Senador Raffy Tulfo ang PNP nga mopakatap kini og daghang personnel sa tanan nga mga Metro Rail Transit (MRT) stations, agi og tubag sa taho nga kuyanap na ang pagpangu-ot (pickpocketing), sexual harassment ug ubang mga krimen sa maong lugar.  Angayan nga mosanong gilayon ang PNP sa awhag sa senador tungod sa kadaghan sa tawo sa MRT stations nga mahimong biktima.  Angay usab ang tawo magmabinantayon kay ang motto baya sa mga mangunguot ug manyakis mao ang, “Kuot sa kuoton ug Hikap sa hikapon.” Fezteleern!