Way pagpakabana

Wa gyud kaayo’y nagtagad, ug ang uban gani dili ra mamati kon ang mga tigbalita mohisgot na kabahin sa pagpanaugdaog sa mga Chinese Coast Guard ngadto sa mga Filipino Navy didto sa West Philippine Sea.

Apan sultian ko kamo nga angay kita nga motutok sa maong isyu kay kon mosipyat, hayan nga mosangpot kini og dakong kaguliyang ug kagubot tali sa atong nasud ug sa nasud sa mga Insik.

Ang kadagkoan sa United States nasuko na sa kanunay’ng gihimo sa mga Chinese Coast Guard nga hasion nila ang atong mga sakop sa Navy nga maghatud lang og pagkaon sa mga tropa nga tua gidestino sa BRP Sierra Madre.

Mipasidaan na ang America, pinaagi ni US State Department spokesman Matthew Miller, ug mipahinumdom sa China nga ang United States padayong mobarug pabor sa ilang mga kaalyado nga nasud.

Wa malipay ang United States dihang mga barko sa Chinese Coast Guard midasmag sa gisakyan sa mga naghatud unta og pagkaon sa mga tropa ng atua madestino sa BRP Sierra Madre.

Nagsalig man gud ang China nga gamhanan kayo sila nga nasud kay kapin sa 1.3 milyones ang ilang mga sundalo, samtang kita wag ani makaabot og 300 mil.

Daghang mga dagkong nasud sa kalibutan ang nagpangagot ang ngipon kabahin sa gihimo sa China ngadto sa Pilipinas, apan nagpaabot lang tingali og tukmang panahon.

Tiaw mo, ang Permanent Court of Arbitration mipagawas na og final report nga ang Pilipinas maoy dunay “sovereign rights” diha sa West Philippine Sea, ug ang gitawag og “nine-dash-line” nga gihimo sa China, dakong sayop.

Wa gyud tingali maghunahuna ang kadagkoan sa China nga dinhi sa Pilipinas pwerteng daghana nga mga Insik nga posibleng maamong kon magkagubot ang duha ka nasud.

Tambag nako sa mga Insik nga ania sa Pilipinas, paghugpong mo ug pagpagawas og baruganan nga awhagon ninyo ang Chinese government nga moundang na pagpanghasi diha sa WPS.

Klaro man gud kaayo ang kabuang niining mga Insik nga nangangkong ila ang West Philippine Sea nga kalayo ra niini gikan sa mainland China?

Dili ra kay ang Pilipinas maoy giilogan og teritoryo sa kadagkoan sa mga Insik, apil ang mga silingang kanasuran sa Asia, mao nga kon magkagubot, kining mga nasura hayan moapil pakigbatok sa China.

Busa, kamo nga kuwang og pagpakabana niining kagubot diha sa West Philippine Sea tali sa Chinese Coast Guard ug sa atong mga tropa, pagmata na kay basin kon magsige ra mo’g lingaw-lingaw sa ubang isyu nga way kapuslanan, makurat na lang mo nga nagkagubat na.