EDITORYAL - Pagpangita og hustisya

Human nga nakagawas sa prisohan tungod sa pagbasura sa mga korte sa tanang tulo ka mga kaso may labot sa illegal drug trade diha sa National Bilibid Prisons nga gipasangil batok kang kanhi human rights commissioner ug senadora Leila de Lima, nagtinguha ang iyang kampo sa paggukod niadtong mga tawong mibutang-butang kaniya og sala.

Si De Lima kinsa nahimo sab nga Justice Secretary sa panahon ni kanhi presidente Benigno “Noynoy” Aquino niadtong 2010 hangtud 2015, gihulagway sa mga human rights observers nga biktima siya sa “political persecution” sa panahon sa administrasyong Duterte.

Sa interbyu kaniya sa usa ka sibyaanan, ang kanhi senadora miingon nga giandam na nila ang pagsaka og kaso kang Duterte ug ni kanhi justice secretary Vitaliano Aguirre II.

Gipasanginlan niya ang duha maoy utok sa paghimo-himo og mga pasangil nga nalambigit siya sa negosyo sa ilegal nga drugas. Tanang mga testigos batok ni De Lima nibakwi sa ilang pamahayag ug miangkon nga sila giipit sa mga polis aron iduot ang kanhi senadora. Ang ubang testigo, namatay sa sud sa prisohan.

Matud pa ni De Lima, nagdumot niya ang kanhi presidente tungod kay sa dihang siya pay commissioner sa Human Rights Commission iyahang gitutokan pag-imbestigar ang mga extra-judicial killings nga matud pa binuhatan sa gitawag og Davao Death Squad sa dihang si Duterte pay mayor sa Davao City.

Si De Lima nabilanggo og dul-an pito ka tuig samtang siya naglingkod pa isip usa ka senador, nga tungod niadto wala siya makaserbisyo og tarong sa mga Pilipino.

Giklaro niyang dili panimalos kondili hustisya ug katarungan ang iyang gipangita kay iyaha kining katungod.

Wala pa siyay plano mokandidato sa sunod tuig tungod kay iyahang unahon ang pagkab-ot sa hustisya, ug tutokan niya ang pagtabang pag-usab sa mga biktima sa extra-judicial killings ilabi na sa panahon sa ‘drug war’ ni Duterte isip presidente.

Si Duterte uban ni Senador Ronald “Bato” Dela Rosa giimbestigahan karon sa International Criminal Court tungod sa duguong drug war. Ang duha mipadayag ng daan nga walay kamatuoran ang mga gipasangil kanila.

Ang pangutana karon, may hustisya kahang mapaabot ang kanhi senadora?