"Manginlabot pero dili manghilabot"

Kini ang gipadayag ni Cebu City suspended Mayor Mayor Mike Rama sa mga kalihokan sa dakbayan sa Sugbo lakip na ang Palarong Pambansa 2024 atol sa gipadayag niyang press conference niadtong nakalabay'ng semana kauban niya si Acting Vice Mayor Dondon Hontiveros,

Bisan matud pa og preventively suspended siya sa Ombudsman apan wala kini magpasabot nga wala nalang siyay buhaton kay usa man siya ka molupyo sa dakbayan sa Sugbo ug siya pa man gyud ang duly elected mayor sa Cebu City. Hinuon dili naman gyud siya makahimo sa iyang official function kay giwagtangan naman siya og gahum sulod sa unom ka buwan.

Sa tinuod lang sakit sa kabahin ni Mayor Mike nga magsud-ong nga ang iyang gipaningkamotan nga ang Palarong Pambansa 2024 mapahigayon sa dakbayan sa Sugbo mora’g ma etsa pwera na hinuon siya o mawala ang iyang bili kay dili naman siya ang naghupot sa gahum isip mayor,. Igo nalang siya pagsud-ong sa bunga sa iyang hinaguan kay siya man gyud pus ang usa sa naningkamot niini.

Hilabihan ka excited si Rama kaniadto ug bisan karon nga sa Cebu City himoon ang labing dako nga paugnat sa kusog nga sugdan karon na petsa 9 ning buwan sa Hulyo. Busa bisan sa iyang personal nga kapasidad nanginlabot siya pinaagi sa iyang panawagan nga maghiusa ang tanan alang sa kalamposan sa Palarong Pambansa nga haum ra pud kay mao man kini ang iyang gitinguha sukad sa pag-bid pa sa dakbayan sa national games hangtud nga nahatagan na kini og katumanan.

Giklaro niya nga ang panginlabot lahi ra sa panghilabot kay nasayod man siya nga dili na gyud siya makapanghilabot kay suspendido na lagi siya sa iyang katungdanan. Bahala pa og ingnon siya pabida gihapon bisan og temporaryong gihulipan siya sa iyang katungdanan. Wala man seguroy sayop kong manginlabot ang suspended mayor sama sa ubang mga molopyo sa dakbayan.

Ang iyang pagkasuspenso wala na magpasabot nga dili na siya mosaksi sa Palaro bisan ug wala o naa man siyay imbitasyon nga  motambong sa opening. Apan seguradong makatambong gihapon siya kay personal man siyang giimbitar ni Acting VIce Mayor Hontiveros isip guest sa opening sa Palaro.

Samtang, in fairness usab ni Acting Mayor Raymond Alvin Garcia, wala man seguro moluwat og bisan unsa nga mahait nga pulong batok kang Rama. Gani kanunay man niyang gipadayag atol sa mga interview ang iyang pagrespeto niini. Busa nagtuo ko nga siya mismo modapit sa suspended mayor sa mga mahinungdanon nga kalihokan sa Palarong Pambansa.

Anaa man seguroy mga ginagmay o ba kaha dinagko na nga wala pagkasinabtanay apan kauban pa man sila sa grupo, tungod og alang sa kalamposan sa Palarong Pambansa si Rama ug Garcia magtakdo ug magkahiusa bisan niini lang panahona.