Usa sa labing lang-og nga nahimo, o wa mahimo, ni suspended Cebu City Mayor Mike Rama mao ang wa pa mahuman nga building sa Cebu City Medical Center (CCMC). Wa mag-inusara si Konsehal Mary Ann de los Santos nga nahibung nganong wa pa matiwas ang proyekto bisan sa P2 bilyones nga gasto sa niaging dul-an sa siyam na ka tuig.
Sakto si de los Santos sa iyang tambag ni Acting Mayor Raymond Garcia nga sa di pa mobubo og dugang P700 milyones susihon una unsay nahuman ug unsa nay nagastohan.
* * *
Makahinumdom pang mga Sugboanon ni Rama human sa makalilisang nga linog niadtong 2013 nga nagsul-ob og helmet (kay mas importante man para niya ang costume kay sa kapuslanan sa iyang gihimo) ug nangunay pagmaneho sa forklift pagtabang pagbungkag sa karaang building sa CCMC.
Makapangangkon si Rama nga nag-apura nga mahibalik ang mga serbisyo sa CCMC human sa katalagman. Duna lay gamayng problema: Ang mga inhinyero nga mas suhito sa mga istruktura nipasalig nga ang karaang CCMC mas paspas nga kaablihan pagbalik para sa mga pasyente pinaagi sa retrofitting, di demolisyon.
* * *
Gigamit ni Rama ang proyekto sa bag-ong CCMC sa pagpasundayag sa talagsaon niyang liderato (pagsulbad sa problema pinaagi lang sa istorya):
Nangangkon nga minilyon ka pesos ang nakolektang donasyon gikan sa manggihatagon nga mga Sugbuanon sa Estados Unidos ug ubang kanasuran para sa moderno ug mas dakong ospital; ug
Dihang nalangay na pag-ayong proyekto, nipasalig na sab nga dunay dagkong negosyante nga motiwas sa CCMC nga wa nay bisan usa ka dako nga maggasto sa panudlanan sa syudad.
* * *
Ang tinuod nga rason sa kalangay sa CCMC gipasabot sa usa sa mga kontraktor sa CCMC, ang M.E. Sicat Construction, nga nikuyog ni Rama sa inspeksiyon sa proyekto niadtong Hulyo 27, 2022 (kay nag-apura ang mayor nga humanon nang building para sa iyang birthday niadtong tuiga):
Wa magtungod ang mga haligi nga gitukod sa nagkalainlaing kontraktor sa nagkalainlaing mga andana; maong di matrabaho ang ibabaw nga mga andana tungod sa dakong risgo sa pagkahugno sa building. Way gihimo si Rama pagkurihir sa seryusong depekto. Pabiling nagtuo nga matiwas ang CCMC pinaagi sa mga paukyab.
* * *