Mga matang sa demonyo

Pagpamalandong sa Malangkubong kaayohan

1.  Demoni Muti (Amang nga Demonyo)

Matang sa sirado nga demonyo nga hilom kaayo sa tibuok proseso sa mga pag-ampo ug eksorsismo. Kanunay nga piyong ang mga mata. Dili mokihol sa mga panahon nga himoon ang pag-ampo mura lamang og walay nahitabo. Giisip kining gamahan nga matang sa demonyo. Hinoon wala kini magpasabot nga wala sila maluya sa pabalik balik nga eksorsismo ug pag-ampo. Gikinahanglan ang padayon nga pag-ampo hangtud makalingkawas ang biktima gikan sa gahum sa kangitngit.

2.  Demoni Occulti/Abditi (Demonyo sa Occult, nakatago nga demonyo)

Hagbay o dugay na nakagamot ang maong matang sa demonyo. Kasagaran dunay mga higayon nga makasinati og mga preternatural phenomenon (panghitabo gumikan sa mga Espiritu sa kinaiyahan o demonyo) nga mahitabo kun anaa ang pasyente. Ang mga tawo nga naa sa palibot uban sa pasyente ang makasinati nga dunay presensiya nga naglaroy-laroy kuyog sa pasyente. Dugang pa, dunay mga panghitabo nga makatindog balahibo kun anaa ang tawo nga gigamhan sa demoni occulti/abditi. Makatabang kun himoon una ang usa ka diagnostic exorcism aron pagseguro kun kaso ba gyud ni sa demonic possession. Dugang pa, dili sab maayo nga himoon dayon ang solemneng eksorsismo labina kun wala maandam ang pasyente ingon man ang mga tawo sa palibot.

Unsay angay nga buhaton?

1.  Aron maluya ang maong demonyo o mga demonyo kinahanglang atimanon ug tikaron sa pasyente sa masubsob nga paagi ang iyang espirituhanong kinabuhi.

2.  Pagdangop sa mga Sakramento sa kumpisal, kalawat.

3.  Pag-ampo sa Santos nga Rosaryo ingon man pagpenitensiya ug pagbuhat sa mga buhat sa kaluoy.

4.  Pagpalig-on sa relasyon sa biktima ngadto sa Dios, sa Simbahan ug sa katilingban sa kinatibuk-an niini. Ning paagiha matabangan siya nga motubo diha sa kinabuhing espirituhanon ug mapanalipdan batok sa gahum sa kangitngit.

Panahon sa Eksorsismo ang mga demonyo mahimong mopadayag ingon nga mga sirado o abli nga mga demonyo. Kinahanglang mamalandong ang si bisan kinsang eksorsista aron makita ang mga pamaagi aron mapapahawa ang maong demonyo.  Dunay mga demonyo nga gahi gyud kaayo ug lisud papahawaon nga tungod niini kinahanglan nga makigtambayayong gyud ang biktima o pasyente mismo pinaagi sa pagpaningkamot nga motubo diha sa makasantos nga grasya ug sa birtud. Dugang pa, mahinungdanon usab kaayo nga atong hinumdoman ang giingon sa atong Ginoong Jesus nga ang ubang mga demonyo mapahawa lamang kun kita sa matinud-anong NAG-AMPO UG NAGPUSA (cf. Mt. 17;21, Mk. 9;29)