Kinauwahian nga paukyab
Ang pahibawo ni Bise Presidente Sara Duterte Carpio nga managan sa Senado ang iyang amahan ug duha ka igsuon mao lang ang labing uwahing paukyab sa ilang pamilya aron sa pagpahinumdom sa administrasyon ni Presidente Ferdinand Marcos Jr. nga nagpabilin silang popular ug di mahimong isalikway.
Ang pahibawo maisip sab nga pasalig sa ilang mga dumadapig aron nga di hingpit nga mobiya sa nagkamingaw nilang grupo para sa administrasyon nga mas daghan og ikatanyag nga mga proyekto, bakanteng mga puwesto, mas dagkong suweldo ug mga benepisyo ug kahigayonan sa pagpanguwarta.
* * *
Ang hulga sa pagdagan sa tulo ka Duterte sa Senado sumpay sa nag-una nilang mga pasidaan batok sa Malakanyang dihang gitangtangan ang bise presidente sa P650 milyones nga confidential funds sa 2024 (P500 milyones sa Office of the Vice President ug P150 milyones sa Department of Education).
Samang way nahitabo sa unang duha ka hudlat (una, ang pag-awhag sa kasundalohan ug kapolisan sa pagbakwi sa ilang suporta ni Marcos aron makapuli si Sara ug ikaduha, ang pagpahibawo nga mobuwag ang Mindanao gikan sa Pilipinas), mahimong mokagar sab ning ikatulo.
* * *
Way aktibong heneral sa militar ug kapolisan nga nangahas sa pagpahibawo sa pagbakwi ilang suporta sa administrasyon. Mga opisyal sa kapolisan sa Davao City nga gipasanginlang sekreto nga niapil sa destabilization plot gipangrelibohan na sa puwesto.
Tulo ka adlaw na human ipahibawo ang posibleng kandidatura sa mga Duterte, wa pay bisan sa mga kanhi opisyal sa PDP, nga naglumba og ambak paingon sa partido sa administrasyon, ang nipahibawo nga mobalik sila sa mga Duterte.
* * *
Gawas sa ilang trolls nga nipabaha sa social media sa mga paneguro nga di nang kapugngan ang gamhanang puwersa nga mohatod pagbalik sa mga Duterte sa Malakanyang, way kisaw ang katawhan bisan sa Mindanao.
Gibakwi sa bise presidente ang iyang pahibawo niadtong Martes nga nagpanikad nang iyang amahan ug duha ka igsuon sa pagsugod sa ilang kampanya pagka senador pinaagi sa pagpasabot niadtong Miyerkules nga wa pa mahingpit ang ilang desisyon. Ang kauhaw og atensiyon sa kampo sa mga Duterte karibalan lang sa ka-insecure sa kampo sa mga Marcos. Kanindot kon dunay paagi sa pagbasura nilang tanan sa 2025.
* * *
- Latest
