Palapdan ang sulbad, dili pagamyan

Kon hain ang progresibong siyudad, sama sa tam-is nga asukal dugokon sab kini sa daghang dayohan gikan sa mga kasikbit ug lagyong probinsiya, kinsa nangayawat nga makakitag opurtonidad sa kapanginabuhian – pinaagi sa pagsulod og trabaho, o pagbubo og negosyo.

Ug mao kini ang nahitabo sa dakbayan sa Sugbo. Hinungdan, midaghan dili lamang pedestrians, kondili, lakip mga sakyanan: pasaheroan man, o pribado.  Samtang ang atong kadalanan, nagkagamay, tungod kay unsa man ang gidak-on niini kanhi sa ulitawo pa ko, wala man gyod kini mainat hangtod niining panahon nga ako aduna nay mga apo.

Hinunoa, misamot pa kinig kagamay dihang bisan daghang Sugboanong magbubuhis ang misupak sa tukoronong Cebu Bus Rapid Transit (CBRT) kay nakitang nag-usik-usik lang sa atong salapi, gipadayon gihapon sa atong kadagkoan. Pastilan, gihiwa gayod ang tungatungang bahin sa daginotong karsada sa Osmeña Boulevard aron anhi itarok ang binilyong balor sa CBRT, bahala nag ang drayber sa mga sakyanang mangagi sa daplin, magisi ang pasensiya sa tumang konsimisyon.

Unya wala pa matagbaw ang nanagdumala ning maong proyekto, gitaoran pag lampposts ang tungatungang bahin niini kay tipik kuno sa Link to the Port features sa CBRT. Maayo na lang, kay giklaro ni Cebu City Transportation Office Assistant Deparrtment Head Atty. Kent Jongoy atol sa ilang City Council session, nga ang asphalt overlay ug pavement markings mao ray anaay permit. Ug walay labot ang lampposts. Diin nakasakmit-angkon og usa ka lane nga espasiyo, makadugang sa kahuot sa trapiko ug makahatag og dakong kakuyaw sa mga sakyanang mangagi.

Todo suporta si Cebu City Councilor Jocelyn Pesquera nga mapugngan kining maong kapalpakan. Siya mibahad nga mahimong mapasakaag kasong administriba ug kriminal ang mga tawong naghimo niini, kon sa imbestigasiyon sa sunod nilang sesiyon, mamatud-an-matumbok nga kini tinuod ug masubay kinsa kini sila?

Dalayegon ang gihimo sa konsehal. Ug mas nindot, kon dili lang lampposts ang iyang ipatangtang. Unta hasta nang bike lanes’ posts sa matag daplin sa karsada, iya pong ipaapil. Kay dili ang pa-tsoytsoy nga makapagamitoy sa karsada ang tukmang solusiyon sa heavy traffic, kondili, ang hamugawayng pagpalapad niini.

Ug bahin sa pagpreserbar sa beauty sa atong giampingang heritage? Dili kini ang hustong dapit!