Ang DOTr miabuso

Di gyud maayo ang gihimo sa Department of Transportation (DOTr) nga mideritso lang sila’g pamutang og mga electric post nga makapagamay sa Osmeña Boulevard gikan sa eskina P. Del Rosario Street lahos na sa Plaza Independencia.

Wa gani sila mokuha og construction permit ug mangayo’g pagtugot sa Cebu City government, ug sa ilang gihimo maisip nga wa sila’y maayong pamatasan kay nagtuo tingali sila nga abi kay ang DOTr usa ka national government agency, hawod na sila.

Una, dili maayo ang ilang gihimo nga gitawag nila’g “pedestrianization” nga gigahinan gyud ang mga tawo nga gikan sa pantalan nga maglakaw subay sa gitagana nga pedestrian passage way nga anaa gyud sa karsada.

Nagtuo tingali sila nga ang mga pasahero nga gikan sa mga barko nga mangabot gikan sa ubang mga probinsya nga modunggo sa atong pantalan, mosakripisyo paglakaw subay sa gitagana nilang pedestrian passage paingon sa BRT route.

Gikan sa Plaza Independencia gibanabana nga moabot og usa ka kilometro ang gilay-on paingon sa eskina P. Del Rosario nga maoy agian sa BRT.

Posible kaha nga mag-antos ang mga tawo nga manaog gikan sa mga barko pagpas-an sa ilang mga bagahe, mga kargamento ug maglakaw gikan sa pantalan subay sa gam-on nila nga passage way?

Tell that to the dead Marines! Nganong magbutang pa man og pedestrian passage nga anha gyud sa karsada nga ang Osmeña Boulevard duna may lapas nga “arcaded sidewalks” ilawom sa mga building daplin sa karsada?

Unya, kanang pagbutang nila og bicycle lanes, duna ba sila’y study kon pila ka bisekleta nga mag-agian diha? Unya, ang mga motor asa man nila paagion? Ipon sa mga sakyanan? Di kaha mosamot og kagubot ang trapiko?

Buyno, kon gusto man gyud kaha sa DOTr nga maghimo nianang maong proyekto nga wa gyud maapil sa orihinal nga plano sa pagmugna og BRT, nganong wa man sila makig-atubang sa mga opisina nga hingtungdan?

Kami sa Traffic Management Board sa Dakbayan sa Sugbo wa gyud masayod niini. Angay gyud sila nga makigtambayayong sa Cebu City Transportation Office kay sa pagbutang nila sa maong mga proyekto nila, ang two lanes nga karsada sa matag direksyon, mahimo na lang usa.

Makamugna kini og kaguliyang sa traffic. Kon gipahibawo pa nila daan ang CCTO ug ang Traffic Board, kabahin sa ilang plano, mapangitaan unta kini og paagi, sama nga dunay matang sa mga sakyanan nga dili paagion sa Osmeña Blvd.

Nalipay ko kay gimando ni Cebu City Acting Mayor Raymond Alvin Garcia nga gub-on ug panguhaon kining gipabarug na nga electric post diha sa karsada nga way permit.