Tambag ni Tatay

Luoy akong anhing Tatay. Nagdako siyang uhaw sa pagpangga sa usa ka amahan. Nagtubo siya nga saka-kanaogan ra sa iyang inahan kang kansang pangita mao ang pagpanindag tinap-anang isda sa merkado.

Ug giantos ang mga kusi, dukol sa iyang mga maayong pagkabutang nga iyaan, kinsa pulos kusog kaayong manugo.

Grade six ra kutob si Tatay. Pero workaholic. Halos tanang bug-at trabaho, iyang gisudlan: nangargador, nagkamaniro, namarungoy, nag-construction worker ug uban pa.

Ang nakanindot lang ni Tatay kay motultol gyod mi tibuok pamilya pagsimba kada Domingo. Ug pokus among atensiyon sa pakighimamat sa Ginoo sulod sa Santos nga misa. Hiyas nga hangtod karon akong nasunod.

Usab, gitudloan ko ni Tatay unsaon pag-antos og mga sakit. Sama sa paglusi niya sa akong dalunggan, pagpig-it pag-ayo sa kinatumyang tumoy sa akong panit dungan ang pag-ingon:

“Mas sakit pa sa tuli kining akong gibuhat nimo. Kon nakaantos ka, mas minus ang imong masinati inig patuli nimo. Resulta?

Uban sa akong mga katalirongang bata, kursonada kaayo kong nagpatuli. Bisag miingon si Noy Moises, magtutuli, nga pahangaron ko, gitan-aw gyod nako giunsa niya paghiwa akong panit hangtod nahuman.

Ang mga pulong ni Tatay morag anestisya. Mao nga sa pagpatuli wala ko batiag kasakit.

Gipasabot pod ko ni Tatay. Nga oras maibog na kog babaye unya makauyab, dili angay masuko ug masakitan ingkaso’g bulagan. Kay kuno, anaa pay daghang babaye nga kapilian. Ingon siya, ayaw lang gyod ibuhos ang 100% nga gugma, kinahanglang magbilin kag igong reserba para patuboon na sab nimog siyento porsiyento alang sa sunod nimong mapilian.

Sanglit, niini lang paagiha nga malikayan ang hingpit pagkapawong sa maayong panghunahuna nga sagad mosangpot sa paghikog.

Tinuod baya ang mga gipanulti ni Tatay. Ning atong panahon karon, pipila na ba ka tin-edyer ang milayat gikan sa hataas nga bilding, ang naghigot sa liog ug nagbitay sa sagbayan nga wala nay kinabuhi human bulagi sa ilang hinigugma? Gani, naalarma na kaayo ang atong taga Department of Social Welfare and Development bahin niini.

Hinungdan, nga ning pagselebrar sa Adlaw sa mga Amahan. ‘Father’s Day’, gipaambit ko kining mga tambag ni anhing Tatay. Ayawat na lang mabasahan ug ang makabasa may makutlong gamayng pagtulon-an.