Insulto sa mga sundawo

Human sa pila ka adlaw nga makabungog nga kahilom gikan sa Malakanyang, mipagawas ni og opisyal nga pamahayag niadtong Biyernes labot sa pagpangatake sa mga sakop sa Chinese Coast Guard sa mga Pilipinong sundawo nga mihimo og re-supply mission paingon sa BRP Sierra Madre.

Bisan klaro sa mga video footage gikan sa Armed Forces of the Philippines nga gidasmagan ang gisakyan sa mga sundawo ug gituyo pagbuslot gamit ang sundang, bangkaw ug kutsilyo ang rubber boat nga ilang gisakyan, matud sa Malacañang nga "miscommunication" ug "aksidente" ra ang nahitabo didto sa Ayungin Shoal.

Sukwahi ni sa pamahayag mismo ni AFP chief of staff Romeo Brawner nga gitabangan ang mga sakop sa Navy Special Operation Group ug gikuha ang mga armas nga ilang dala alang sa tropa didto sa BRP Sierra Madre. Atol sa pagpangatake walo ka mga sundawo ang naangol diin ang usa niini naputlan gyud sa  kumagko sa iyang too nga kamot.

Nakasabot ko nga di gusto ang Malacañang nga mograbe pa ang tensiyon apan dili husto nga ipakaminus ni Executive Secretary Lucas Bersamin ang nahitabo.

Dunay mga kinabuhi sa atong mga sundawo nga nabutang sa piligro atol sa hitabo nga klarong tinuyo ug dili aksidente. Gani makadaghan na ni nga higayon nga gihimo sa China ngadto sa atong mga sundawo nga igo lang naghatod og supply.

Dakong insulto sa mga sundawo nga misugal sa ilang kinabuhi batok sa mga abusadong sakop sa Chinese Coast Guard ang pamahayag sa Palasyo.

Daw sa gibudburan niini og asin ug limonsito ang samad aron pagtabon sa ilang kainutil ug katalawan.

Lisud ba gyud alang sa Malakanyang bisan ang pagkundinar nalang sa gibuhat sa Chinese Coast Guard?

Hinaut nga bisan nibahag ang ikog sa mga opisyal sa Malakanyang magpabiling isog ug taas gihapon ang moral sa atong mga sundawo.

Ug hinaut way mga mapuslanong politiko nga mokabayo sa nahitabo aron galgalon ang atong mga sundawo alang sa personal nila nga interest.

Taliwa sa hulga nga giatubang sa nasud batok sa atong soberinya, dili makatabang ang laing krisis nga posibling motumaw kun dunay mga laog sa pwesto nga mosalida.