Motambong ba si Rama sa Palaro?

Hapit na ang opening sa Palarong Pambansa nga anhi ipahigayon sa Cebu City sa tungatunga sa buwan sa Hulyo.

Dunay nangutana nako kon makatambong ba si Mayor Michael Rama nga suspendido man siya sulod sa unom ka buwan hangtud sa Nobiyembre?

Dili ikalimod nga si Mayor Rama mao gyud ang naninguha nga anhi sa Cebu City mapahigayon ang nasudnong sports event sa wa pa siya pahamtangi og preventive suspension.

Kabahin sa pangutana kon makatambong ba si Mayor Rama sa opening sa Palarong Pambansa nga anha himoa sa Cebu City Sports Center, si acting Mayor Raymond Alvin Garcia ra gyud ang makatubag.

Apan kon ako’y pangayoan og hunahuna kabahin niini, mosugyot ko nga imbitahon ug patambongon lang si Mayor Rama sa pagbukas sa kalihokan, apan mahimong dili lang siya pasultihon.

Nganong patambongon man siya? Ang Palarong Pambansa salmotan kini sa mga tinun-an gikan sa lainlaing mga siyudad sa nasud, ug si Rama maoy chairman sa League of Cities of the Philippines.

Apan kay ang maong kalihokan gikataho nga tambongan man usab ni Presidente Bongbong Marcos, ni Vice President Sara Duterte, ug sa ubang dagkong opisyal sa kagamhanan, mahimo nga si Rama dili lang palingkoron duol sa presidente.

Ngano man? Nasabot nako nga way maayong pagtagad karon si Presidente Bongbong kang Mayor Rama tungod niadtong pagtambong niya sa Prayer Rally nga gipasiugdahan ni kanhi Presidente Duterte didto sa SRP.

Si Duterte ug Bongbong wa karo’y maayong pagtinagdanay, mao nga kay si Mayor Rama mora man og may pagdapig ni Duterte, mao nga klaro kaayong wa siya’y gana motagad ni Mike.

Para kang Acting Mayor Raymond, modayeg kaniya ang katawhan kon maninguha siya nga makatambong si Rama atol sa opening sa Palarong Pambansa.

Total, si Raymond maoy maisip nga “bida” sa kalihokan kay siya man ang acting mayor, ug siya ang mohatag og mensahe sa nga’n sa dakbayan sa Sugbo.

Kining ako, usa lang ka sugyot ug usbon ko, anaa ra gyud ni Acting Mayor Raymond ang paghukom kon patambongon ba niya si Mike, o dili.

Apan kon patambongon man si Rama sa pagbukas sa Palarong Pambansa, bisan og tinuod nga ubos siya karon sa preventive suspension, dili na lang kini hisgotan.

Kon ipaila man siya nga apil sa mga bisita, mahimong ingnon lang nga “Mayor Michael Rama, chairman sa League of Cities of the Philippines” ug adto siya palingkoron uban sa mga opisyal nga bisita.