EDITORYAL - Kurapsyon sud sa City Hall

Daghan ang nasagmuyo sa rebelasyon sa siyam ka mga kawani ug kanhi kawani sa Cebu City Disaster Risk Reduction Management Office nga adunay pipila ka sakop sa maong departamento ang nalambigit sa kurapsyon.

Gibutyag kini mismo ni Konsehal Pastor Jun Alcover atol sa press conference niadtong Martes. Seryuso kaayo kini nga alegasyon gikan sa mismong mga kawani sa maong departamento nga gisaligan sa siyudad panahon nga adunay emerhensiya.

Ang mga namasangil siguradong mas ubos og posisyon sa mga gireklamong kawani diha sa CDRRMO. Usa gani sa nireklamo miingon nga hasta iyang sweldo gipaakan kay iamot daw pagpalit og galamiton sa maong opisina.

Unsa gipasabot niini? Nga silang mga empleyado maoy nag-provide og galamiton sa maong opisina? Wala diay supply ang siyudad para niini?

Dugang sa mga gipasangil mao nga dunay mga supply sa gasolina ug krudo sa ilang mga sakyanan nga gipangkawat, ang uban niini para ibaligya ug duna say gigamit sa personal nga sakyanan sa mga hiwing opisyal sa ilang buhatan.

Dunay matud pa himuong imbestigasyon si acting mayor Raymond Alvin Garcia kabahin niini. Apan sa wala pa kini sugdi gimando na niya kagahapon ang pagpahunong og hatag og alokasyon sa petrolyo sa tanang mga sakyanang gipanagiya sa siyudad apil na ang mga giisyu ngadto sa mga barangay.

Pagkadaghan sa maapektahan niining hitaboa. Hinuon ang mga emegerncy vehicles maoy exempted niini sama sa mga ambulansiya, patrolcars sa mga polis ug sa bombero.

Kaning hiwing binuhatan posibleng dili lang sa maong buhatan nahitabo. Posibleng duna say mga susama niini nga binuang sa ubang departamento ug ahensiya sa City Hall.

Kun tinuod kining gibutyag sa maong mga kawani, seryusohon unta kini sa mga opisyales sa siyudad, ilabi na nga niadtong Covid-19 pandemic pa diay kini nagsugod.

Pila na kaha ka drums nga petrolyo sa katawhan ang nakawat aning mga tawhana?