Usa sa mga dako og papel para sa mga malambuong mga lugar ang populasyon. Kay pinaagi sa populasyon himsog ang ekonomiya tungod ang tanan duna may tagsatagsa nga matampo bisan tuod dili tanan maoy nanarbaho.
Apan dala sa problema sa pagdako sa populasyon ang overcrowding o paghuot sa mga tawo sa usa ka espasyo.
Sa paghuot sa mga estraktura, usahay mataligam-an pirme ang pagpangandam sa posibleng dili maayong mahitabo sa pagdako sa populasyon. Kun modako ang populasyon makalapad ang lugar nga gikinahanglan para kanila.
Kauban niini ang paghuot sa mga kadalanan, mga estraktura sama sa mga kabalayan, mga balay patigayon ug uban pa.
Sa mga naporma ng mga siyudad, dako kaayong problema ang pagdumala baha, gagmay kaayong mga karsada, kakulang sa mga linya sa kuryente ug sa tubig. Pulos kini mga basic needs sa mga tawo.
Mao nga sa mga lungsod diha, samtang wala pa sila magatubang og susamang porblema sa mga dagkong siyudad, mas maayong planuhon nalang daan sa mga kasamtangan nilang lokal nga opisyal ang pagplano.
Planuhon na nilang daan nga dagko ug lagpad ang mga dalan apil na niini ang mga dagko sab nga mga drainage systems diha sa mga kilid sa karsada aron kun moasenso ilang lugar ug modaghan na ang magtukod og mga edipisyo pangpatigayon, dili na problema ang kadalanan.
Sunod nga apilon sa plano ang pagtan-aw kun asa ibutang ang mga dagkong kanal nga adto tanang mga drainage networks sa mga karsada mapunta nga walay putol-putol.
Labaw nga kinahanglan daang sigurohon ang 3-meter easement zones sa mga kilid sa mga kasapaan.
Samtang wala pa maghuot ang mga tawo, mas maayong mentinahon ng daan nga walay patukoron og estraktura sa mga kilid sa mga sapa, bisan mga patigayon kinahanglang patumanon gyud niini.
Kinahanglan lang nga adunay mga lokal nga mga ordinansang pandayon para niini. Ug kinahanglan sab nga seryuso kining ipasunod sa tanan pinaagi sa mga barangay officials kay sila maoy nasuhito sa ilang mga dapit.
Dili na kinahanglang paabuton pa sa mga kalungsoran masinati ang mga problema sa mga dagkong siyudad karon. Karon palang daan mas maayong managana na sila.