Maayong balita
Ang pagpananum mahinungdanon kaayong kabahin sa kinabuhi sa mga tawo mao nga kasagaran sa mga sambingay sa atong Ginoo gigamit gyud kining maong mga paghulagway aron mas masabtan ug mas sinati kaayo sa pandungog sa iyang audience. Nga sa ato pa, nakasabot sila sa iyang gipamulong.
Sayud sila sa proseso gikan sa pagtisok sa binhi hangtud na sap ag-ani niini apan kun sa unsang paagiha kini nahitabo, bugtong ang Dios lamang ang nasayud bisan pa man kun matag adlaw kini nila nasinati ug nasaksihan sa ilang kinabuhi ug panginabuhi.
Kasinatian
Nahimong kasagaran lamang ang mga panghitabo sa atong palibot. Ning maong mga panghitabo wala kita manumbaling kay lagi mga naandan na lamang. Gani, tungod kay naandan nahikalimot kita sa pagsud-ong sa presensiya sa Dios ning maong mga hitaboa.
Hangtud nga matingala na lamang kita kun sa unsa ug nganong nahitabo man kining mga butanga. Ang panaw sa pagtuo sa laing bahin kun atong ilinya diha sa kabubut-on sa Dios, atong masinati nga sa paghamtong ug sa pagbunga niini nahimo kitang kabahin.
Ang pagtuo nga atong nadawat wala lamang nitubo sa iyang kaugalingon lamang kondili nahimo kitang kabahin ug gani nitubo man usab kita. Ug kun ugaling matingala kita nga taliwala sa atong kahuyang kita nihamtong sa kinabuhi sa pagtuo, atong nakita kun unsa diay kamahinungdanon sa Grasya alang sa atong kinabuhi.
Lihok
Karong semanaha himoang makatuhop ang mensahe sa Pulong sa Dios sa imong kasingkasing ug kinabuhi. pasalamati ang Dios sa daghang mga grasya nga imong nadawat. Sa hinay hinay nga paagi himoang mapuy-an mo ang pagtuo adlaw adlaw sa imong kinabuhi. Hinumdomi nga ang Ginoo wala magkinahanglan nga kita mamahimong malampuson sa tanang mga butang, iyang gipaabot nga kita mamahimong matinud-anon sa atong pagtuo ngadto kaniya.
Pangamuyo
Ginoo salamat sa pagtuo nga imong gihatag. Nitubo kami ug nabuhi pinaagi niini. Ang binhi nga natisok sa among kasingkasing molipang unta ug motubo ingon nga lig-ong kahoy diin ang mga anak nimong nagkinahanglan sa imong pag-amoma ang makapahimulos sa landong sa imong Amahanong Pag-amoma. Sa wala damhang paagi nahimo kaming nilipang gumikan sa imong grasya. Pinaagi sa gamhanang ngalan ni Jesus among Ginoo. Amen.