Mihatag na sa iyang pagpasabot ang ninang sa nagpakasal nga nag viral sa social media nga giingon sa parokya sa Saint Andrews Parish Church sa Amlan, Negros Oriental. Ang pamahayag ni nanay Charlene Sunico napublikar sa Facebook page ni Anthony Manginsay.
Si nanay Charlene Sunico miangkon nga siya ang sad-an sa tanan. Iyang giangkon nga siya ang nagpahibawo sa kaslonon nga nausab ang skedyul sa kasal gikan sa orihinal nga alas 8:00 sa buntag ngadto na sa alas 9:30 sa buntag. Iyang gipasabot nga ang iyang gisulti sa kaslonon iya kining gibasi sa sulti sa iyang kauban sa simbahan nga wala na niya isulti ang pangalan. Iyang giingon nga tungod sa iyang pagka matinud-anon mituo pod siya sa gisulti sa iyang kauban nga sa kaulahian iyang nasayran nga haka-haka lang diay.
Tungod sa hitabo nangayo dayon siya og pasaylo sa kora paroko nga si Msgr. Bohol ug ni Fr. Jovencito Kho. Nangayo pod siya og pasaylo sa gikasal. Iyang giklaro nga wala gayoy sala ang pari ug mga kawani sa simbahan. Dugang pa niya nga ang hitabo binuhatan ni satanas nga gustong mobungkag sa simbahan.
Si nanay Charlene nahisama sa Ginoo nga giangkon ang kasalanan sa katawhan sa kalibotan.
Sakto ang pag-angkon ni nanay Charlene Sunico sa iyang kasal-anan tungod nasayop gyod siya. Kay mitoo lang pod dayon sa gisulti sa iyang kauban sa walay pagpakisusi kun tinuod ba kini. Apan dili puwede niyang angkonon ang sala ni Fr. Jovencito Kho. Dili si nanay Charlene ang nangasaba sa kaslonon. Dili si nanay Charlene ang misugod sa misa bisan wala pa mahuman og paso ang kaslonon.
Ang sala ni nanay Charlene iyang sala ug ang sala ni Fr. Jovencito Kho iya pod kining sala.
Ang sala sa pari mao ang pagpangasaba sa kaslonon sa walay pagpangotana nganong nalangay sila sa skedyul sa ilang kasal. Gidretso lang niya og kasaba ang kaslonon.
Wala hatagi og due process sa pari ang iyang gikasal. Nakalimot ang pari nga ang Ginoo mihatag gani og due process ni Adan ug Eba dihang nakalapas kini sa iyang mando.
Kun nangayo og pasaylo si nanay Charlene Sunico sa gikasal, way rason nga dili pod mangayo og pasaylo si Fr. Jovencito Kho.